Ka NEDA dei ka rynsan, baroh ki seng ki trei la kajong ka kam

Shillong, 06 Naiwieng:
U nongialam ka BJP ba peit ia ka Meghalaya u Nalin Kohli u la ong ba ka North East Democratic Aliance (NEDA) ka dei ka rynsan ban iakren ia ki kam pynroi jong baroh ki seng sain pyrthei ka dong mihngi bym dei ka Congress bad ka jingiakren ban iakhun ia ka elekshon kam pat poi mynta.
Haba kren sha ki nongthoh khubor ha kane ka sngi Saitjain ha nongbah Shillong, u Kohli u la ong ba baroh ki seng sain pyrthei kiba don ha ka NEDA ki don la kajong ka kam ban trei ban pynkiew iala ka party bad kam pat don satia ka jingiakren ban iakhun ia ka elekshon da kaba iabhah ne iatreilang.
“Ka NEDA ka dei ka rynsan ban iathir ia ki kam ba iadei bad ka roi ka par ha North East bad ka jingiakren halor ka jingiakhun ia ka elekshon, kam pat don satia”, u la ong.
Lah ban kdew ba ka NEDA la thaw hapoh ka jingialam u Himata Bisaw Sarma u myntri ka sorkar Assam na ka BJP bad la don lang bun ki seng sain pyrthei ha kane ka thain ki bym iadei bad ka Congress. Nangne na Meghalaya kiba don bad ka NEDA ki kynthup ia ka UDP, NPP.