Ka nam jong phi kan sah

E.W. Kharsahnoh
Mawroh, 21052021

Ki ‘er pathai khubor na saw lyer ki wanrah,
Hapdeng kine ki por ba pyrthei ka kynjah;
Kynsan kynsan ïohsngew ba her ki jingsawa,
Ba I Bah Waroh Pde I la khlad noh mynta.

Ani! Jingsngewbynnud, katno jingsngewpangnud,
Ha la marwei marwei mynsiem katno ka ud;
Jingim ba shiphang por, kyndit ka shu her noh,
Kum sla dieng ka shu tlor, ka her sha lyndet lyoh.

Kynmaw shisien tohkhat ba ïakynduh ryngkhat,
Ban ïakren ïakhana, katno jingsngewtynnat;
Pynban I la leit noh, kumne napdeng jong ngi,
Nangne I la her noh sha kawei pat ka ri.

U Kaitor ba pawnam ka ri u hynniew trep,
Sur myllung sawa jam, na ngi wat ai kin sep;
Tang jingkynmaw tympang ha ngi ai kin ïaisah,
Jingrwai ki sur ba bang na ngi wat ai kin jah.

Bah Waroh Pde phi long u ‘riew don sap don phong,
Katto phi la pynroi ki sur tynrai la jong;
Jaitbynriew Khasi-Pnar, sur jong phi kin ym jah,
Ha ka ri salonsar ka nam jong phi kan sah.