Ka Mynken HS, ka dei kaba ju rah bun ki khusnam ha ka Subroto Cup

Bhoirymbong:Ka Mynken Higher Secondary School Bhoirymbong, la ju tip kum ka skul kynjatbol ha ka jylla namar ba ka la ju rah bun ki khusnam ha ka lympung ialehkai Subroto Cup bad ki jingialehkai iakura ne boxing.

Mynta ka sngi, u director ka directorate of School Education u Swapnil Tembe, IAS shi bynta ban sakhi ia ki sap ki phong jong ki khynnah lyngba ka Prokram STEM Exhibition kaba dei ka pilot project kaba la leh da ka Smart Village Movement and Curiosity Gym, Mumbai.
Ha kane ka sngi, u Tembe, u la sakhi ia ki sap jong ki khynnah kane ka skul ha ki jingshna bad ki buit bapher bapher lyngba ki jingstad saian bad technology.

“Ngi la jied katto katne ki skul kum ka Pilot project ban pyntreikam ia ka STEM bad nalor ka Mynken presbyterian Higher Secondary School kawei pat ka dei ka skul ha Mawphlang’, la ong u Tembe.
Ka jingmut ba kongsan jong kane ka STEM ka long ban pynlong ia ki khynnah ban bang ha ka saian bad ka jingkhein bad kiwei ki jingshem buit.
La ioh ruh ban iakren bad u Principal ka skul u babu E Pyngrope uba la batai ba kane ka prokram ka la khring ia ki khynnah, wat la ha kaba nyngkong kim don ka jingsngew kwah hynrei ynda kila pyrshang kila nang bang nang bang ban pynleit jingmut ha kane ka bynta namar ba ki ioh ban leh da ka praktikal ruh.
La kyrmen ba lyngba kane ka projek STEM, kin sa mih bun ki enjiniar, ki doktor, ki saiantis ha ki sngi ban wan lyngba ka jingsdang na ka Mynken Higher Secondary School.

U babu Pyngrope u la iathuh ba ka jingpaw bad ka jinglah ka skul ban leh bha, ka dei namar ba ka bor pyniaid skul ka la aiti met bad mynsiem ban pynbha naduh ki jingtei ka skul watla kam pat ioh kano kano ka jingiarap na ka sorkar. Ia ki jingaiti met bad mynsiem ka bor pyn iaid skul ban pyntyllun watla kim pat ioh ka jjingiarap na ka sorkar kum ka jingshna ia ka jing tei kaba da ki phew lak. U babu Pyngrope u la iathuh ba namar ba ka skul ka la pawnam bha ha ki jingialehkai, ka la khring ia ka sorkar India ban ai ia ka skhim Khelo India lyngba ka Boxing khamtam ba kane ka skul ka pawnam bha ha ka jingialehkai kynjatbol.

“Ia kane ka skul (Mynken Christian Higher Secondary School) la ju tip kum ka skul Sports naduh kham mynshwa namar ba ka paw bha ha ka jingialehkai kum ka Subroto cup, kaba la rah ruh ia ka khusnam la lai sien”, la ong u Principal.
U la iathuh ba kane ka skul ka dei tang maka, kaba la ai ka jingshakri haduh klas XII naduh ka Arts, Commerce bad Science Stream ha ka thain bynta mihngi ka ri-Bhoi ter ter shaduh khappud ka Assam.