Ka MRSSA ka la treikam, la don ka district Task Force ruh, ong u bah Prestone

Shillong:U symbud myntri rangbah ka jylla u bah Prestone Tynsong, u la ong ba ka ain shongwai ka Meghalaya Residents Safety and Security Act (MRSSA) 2016 ka la treikam ha ka jylla watla lah ban ong ba kam pat treikam lut.

Haba kren mynhynnin ka sngi sha ki lad pathai khubor, u bah Prestone ula ong ba katkum ka jingsngewthuh jong u, ka MRSSA ka la treikam hynrei ha kaba iadei bad ka jingpynkylla kaba la mynjur ha u snem 2020, ka sorkar pdeng ka la pan jingshai halor ki katto katne ki bynta ha kaba ka sorkar jylla kan iasyllok ia kane ka bynta kaba wanrah jingkylla ha kane ka ain.

Hynrei ha kaba iaddei bad ka jingpyntreikam ia ka MRSSA, ka la treikam ha kaba ka la don ka District Task Force (DTF) bad ki don ki committee bapher bapher ha district ha kaba ki briew kiba wan nabar ban wan trei, ne leh ki kam khaïi pateng, ki donkam ia ki ïingsah bad ban ioh sah wai, ki donkam ban pynbiang ia ki kot ki sla kiba la donkam lyngba ki Rangbah Shnong ban leit aiti pat sha ki thanat pulit ba jan tam.
U la ong ba ki trai ïing kim lah ban shu ai wai sop sop khlem bud ia ki ain.

Lah ban kdew ba ka KSU dang shen ka la buh jingkylli ia ka sorkar ha kaba ka la kam ba kam shym la pyntreikam ia ka MRSSA bad dei na kane ka daw, ka la kam ba kan iarap ia ka sorkar da kaba pyllong ia ka jingtalasi ia ki briew kiba wan nabar sha kane ka jylla.
Kumjuh u la ong ba ka sorkar jylla ka dang iai buddien halor ka jingdawa ban pyntreikam ia ka Inner Line Permit (ILP) bad ia ka ktien Khasi bad Garo.