Ka MRSSA, ka ILP ki dei ban urlong ha u snem thymmai lem kumta, ka ap ka jingiakhih kaba jur:CoMSO

Shillong: Ha ka jingialang ka ba la pynlong ha Motphran,ha ka sngi balang, ka Confederation of Meghalaya Social Organisation, ka la byrngem ba ha u snem 2021; lada ka sorkar kam lah ban pynurlong ia ka jingdawa kaba kynthup ia ka jingpyntreikam ia ka Meghalaya Resident Safety and Security Act Amendment Bill 2020 bad ia ka Inner Line Permit, ka jylla kan don hapdeng ka jingiakhih ka ba jur.

Haba kren ha kane ka jingialang, na ka liang u General Secretary ka CoMSO u bah Roykupar Synrem u la ong ba ha u snem thymmai ka sorkar ka la dei ban pynurlong ia ki jingdawa ia ka MRSSA bad ia ka ILP, hynrei lada katei kam urlong, na ka liang ka CoMSO kan mih madan bad ka jylla kan don hapdeng ka jingiakhih ka ba jur. U la ong ruh ba lada ki 60 ngut ki MLA kim lah ban pynurlong ia ka jingdawa ILP ha ka jylla ka la dei ka por ia ki nongshong shnong ha ka jylla ba kin mih shakhmat ban iasnoh kti lang ban iakhun ban pynioh ILP ha ka jylla.

U la ong ruh ba ka jingdawa ILP ha ka jylla Meghalaya, ka dei ka ba la slem, hynrei mynta ka kynti ka CoMSO kan ym kynran dien ban ialeh haduh ban da lah ban pynioh ia ka ILP ha ka jylla.