“Ka MPCC ka la pynkheiñ ia ka riti synshar ka seng Congress”

Shillong, 17 Risaw:
U Chief Executive Member ka KHADC u bah Pynshngaiñ N Syiem u la ong ba ka Meghalaya Pradesh Congress Committee ( MPCC) ka la pynkheiñ ia ka riti synshar ka seng Congress da kaba sospon ia u khlem da pan jingpynshai shuwa, “Ka kyndon kaba ha khmat eh ka dei ban pan jingpyn-shai shuwa, lada lap ba uno uno u dkhot u leh pyrshah, hynrei kim leh ia kata kim shym la pan jingpynshai na nga, ki sospon noh beit wut wut tang hapoh ki kynta” ong u bah Pynshngaiñ uba la don la bun bun snem hapoh ka seng Congress.
U la ong ruh ba katei ka jingleh ka MPCC dei ka jingleh kyrkieh palat kaba ki la leh tang hapoh ki kynta bad u la ong ba ka long ruh kumjuh kumba ki la pynjlan ia ka Dorbar Thaw-aiñ tang na ka daw ban pyntreikam jubor ia ka kam ar maloi. U la ong biang ba kaba sngewthamula palat ka long ba ka samoi treikam jong u kum u MLA kan kut noh sa tang shisnem shiteng hynrei ka seng Congress ka la sospon ia u haduh 3 snem. Haba la kylli u don jingmut ne-em ban iakhun ia katei ka jingshah sospon jong u da kaba leit ban ia kren bad ki heh ka AICC, “Em, ngan ym leit” u la ong bad katkum ka jingkren u bah Pynshngaiñ la sngewthuh ba um ngeit ba ka jingshah sospon jong u ka dei ka hukum ka AICC, “Kam shym don ha ka shithi ba nga ioh ba kin ong ba ia kane la leh da ka jingbthah ka AICC, kim shym ong kumta” u la ong.
Katba u bah D.D Lapang pat u President ka MPCC u bah D.D Lapang u la ong ba ym donkam shuh ban pan jingpynshai na u bah Pynshngaiñ naba u la leh shaba palat pud. U bah Lapang u la ong ba naduh ka por ba long Secretary in charge u V.Narayanasamy la khot ia kren ia u ban wanrah sha ka jingiasngewthuh jingmut hynrei um wan sha ka jingiakren, nangta ha ka por ba wan u C.P Joshi kum u Secretary incharge ruh la khot ia kren hynrei um treh ban wan ia kren.
U bah Lapang u la ong ba la ai ka lad ka lynti ia u bah Pynshngaiñ katba u sngewmon ban pynbeit ia ki kam kynrum kynram hapoh ing , “Ngi la iaishah , ngi la ai bun ki lad, wat ka AICC ruh ka la leh katba lah hynrei kam lah ban pynbeit ia u bah Pynshngaiñ, ngi la rem bad u la shim ia ka rai kaba biang eh na bynta jong u hi” ong u bah Lapang. Kham mynshuwa u bah Pynshngaiñ u la kynthah ia ka MPCC ba ym don ba lah ban khot ia ka jingialang Parliamentary Party bad dei tang ma nongialam CPP uba lah ban khot ia katei ka jingialang ki MDC, halor kane u bah Lapang u la ong “Sngewsynei pynban ban don ki bym tip ia ki kyndon bad ka riti synshar jong ka seng”.