Ka MP ka iapher na ka MLA, ka Congress ka jop MP na Tura, ka wan balai ha Gambegre, ong u Rakkam

Shillong:U myntri ka tnad pule puthi ka jylla, uba dei ruh u nongialam ka NPP u Rakkam A Sangma ula ong ba ha ka MP bad ka MLA ka iapher ka elekshon bad ka nongmuna ka la kren shai ba watla ka Congress ka la jop MP na Tura, hynrei ka la wan balai syndon ha ka elekshon shiteng samoi ha Gambegre dang shen bad kane ka dei ka kut ba skhem jong ka Congress.

Haba kren mynta ka sngi, u Rakkam u la ong ba ka politik ka kylla beit man ka por bad ym lah ban kam ba ka long kumta.
U la ong ki don kiba iasoh sha ka Congress kumba 500 ngut hynrei tang ha Gambegre, kumba 8000 ngut ki iasoh sha ka NPP.

U Rakkam ula ong ba ki nongialam kiba tbit, kim ju leit phai shuh sha ka iing barim, hynrei ki tei ia ka iing kaba thymmai bad ula ai nuksa kum u PA Sangma u mih na ka Congress, u Capt. WA Sangma um leit shuh sha APHLC bad bun kiwei pat.
Ia kane u la kren siat ia u Dr. Mukul Sangma hadien ba ka la sawa ka khubor ba u lah ban leit phai biang sha ka Congress.

Hynrei ha kajuh ka por, u la ong ba um tip, ia ka khubor ba u Dr. Mukul Sangma ba un leit iasoh sha ka Congress namar ba ula don ka iing TMC.
“Ia u Dr. Mukul Sangma la hikai u PA Sangma ha ka kam politik. Klet ia ka MP elekshon, u Dr. Mukul u dang don ka bor kumba ka paw ha ka elekshon shiteng samoi ha Gambegre ha kaba ka TMC ka wan baar hapoh ka jingialam u Dr. Mukul, katba ka Congress ka wan balai”, la ong u Rakkam.