Ka MP elekshon, ka long kaba jwat ban iathuh lypa, ong ka kong Ampareen

Shillong: Ka kyrtong MP ka NPP sha ka Lok Sabha na Shillong Parliamentary konstitwensi, ka kong Ampareen Lyngdoh ka la pynpaw ba ka elekshon MP ka long kaba kham jwat ban lum jingkhein ne ban tip lypa ia ka jingjop jingrem.

Haba kren mynhynnin ka sngi, hadien kumba shi bnai eiei ba la dep thep vote, ka kong Ampareen ka la ong ba jinglum jingkhein ka dei ka rukom ki seng sain pyrthei hynrei ka elekshon MP kam dei kaba suk ban khein lypa, wat la ka la don ka jingkhein na ka liang ka party tangba kam don jingmut ban iathuh lypa. “Ka MP elekshon ka jwat ban iathuh lypa, wat la ngi la leh ia kata tangba ngim kwah ban iasam ia kata, kam don jingmut ban shu ia kam”, la ong ka kong Ampareen.

Ka la ong ba kaba donkam ka long ban ap beit ia ka jingmih ha ka 4 tarik Jylliew, bad kum ka kyrtong ka la leh ia kaba dei ban leh. Ka la ong ba ka jylla ka donkam ia ka MP kaba khlain bad kaba shlur ban kren na bynta ka jylla.



Kum ka briew ka la leh ia kaba donkam bad kaba sah ka long ban shaniah ha u Blei. Ka la ong ba lada jop ne rem, ka sorkar ka la ioh jingmyntoi na ka jinglong kyrtong MP jongka. “Nga la leh kum ka briew, ka shong sa ha u Blei”, ka la ong.