AIS Suja
Ka mluh ka long kaei kaei ka jingpyllong ba phylla jong u Blei kaba u Blei ula thaw phylla bad ka long ka bynta ba donkam ha ka jingim ia kaba u briew um bit ban duh ia ka bad khlem ma ka ki jingbam kin ym don jingmad wat lada kata ka jingbam ka bang katno katno ruh. Lada ym don mluh kiei kiei ki long kiba blad suda, namar kata, ka mluh ka long kaba donkam tam ha ka jingim u briew, ym tang ha ka jingim briew hynrei ka treikam ruh wat pra kiwei pat ki bynta trei kam jong u briew, wat la ka long kaba tatdor haba ianujor bad kiwei pat ki mar ki mata.
Na kata ka daw u Jisu u ong – “Phi phi long ka mluh ka pyrthei: te lada kata ka mluh ka kylla blad da ei yn pynbha pat ia ka? Naduh kata ym donkam shuh ia ka, hynrei tang ban bret noh shabar bad ban iuh ia ka hapoh kjat ki briew” Mathaios 5:13.
Ki nongbud u Jisu Khrist ki Khristan ki long kum ka mluh ha kane ka pyrthei ia kaba ki briew baroh ka pyrthei ki peit sha ki ban ialam ha ka lynti kaba dei ban wallam ia ka shongsuk shongsain ka tipbriew tipblei, kiba lah ban pyniadei hapdeng para briew ban pyllong ia kane ka pyrthei ka Eden jong ka jingsuk da kaba bud bad kohnguh ia ki jinghikai ka Bible, ka ktien u Blei, namar ki jinghikai ka ktien u Blei ki long kiba kordor bad donbor haduh katta katta ba uwei pa uwei u donkam ia ka ha ka jingim kumba donkam ia ka mluh hi.
Te lada kiba khot ialade ba ki long ki Khristan ki nongbud u Jisu Khrist kin don ia ka mluh ba kynja mynsiem ha ka jingim kin kylla blad noh bad kam don jingmut shuh, kata te sa tang ban bret noh shabar bad iuh hapoh ki kjat ki briew. Lada kata ka jinglong jingim Khristan ka long pyrshah ia ka jinghikai ka ktien u Blei, kata ka mut ka la long pynban kum ka mluh kaba kylla blad kaba ym donkam shuh ia ka sa tang ban bret noh ia ka namar ka long kaba ma ban pyndonkam kum kata ka mluh.
Ka mluh ka donkam ia u briew baroh ia uba duk uba riewspah ia uba biej ia uba stad ia uba khraw bad ia uba tlot bor. Kumjuh ruh kane ka jia ia ki bangeit ban long kum ka mluh ha ka jingim briew ha kane ka pyrthei ba kiwei kin ioh mad ia ka bor jong kata ka mluh ba kynja mynsiem kaba khring ia kiwei sha ka lynti ka jinghikai ka ktien u Blei.
Ha kawei pat ka bynta u Jisu u ong – “Phi phi long ka jingshai ka pyrthei”. Ki nongbud u Jisu Khrist ki long jingshai ia kane ka pyrthei kaba dum. Namar haba u Jisu um pat wan sha kane ka pyrthei, ki briew ki im hapoh jingdum la tap da ka jingdum jong ka pop, bad u soitan u dangteh mraw ia ki briew da ki kynjri nar jong u. Bun ki dang ngeit ha ka jingngiet biej ngeit mutdur bad mane blei thaw kulmar. Hynrei haba u Jisu ula wan ula long ka jingshai ia ka pyrthei bad kaba dum ka la jah noh namar u long u sngi ka hok bad ka jingshisha bad u la pyllaitluid ia u briew na ka jingshah teh mraw ha ka pop bad u soitan. Kumta, mynta ia kane ka pyrthei kaba mynta ba kata ka jingshai kan ialam ia ki briew sha ka Diengphna u Khrist ym shuh ban leit phai sha kata ka jinglongmraw jong u soitan.
Ka jingshai ka long kaba donkam tam ha ka jingim briew. Khlem ka jingshai ym lah ban iohi ha ka por ba dum mynmiet. Ha ki snem ki bym pat don ki bor light electricity ki briew ki pyndonkam da ka dongmusa bad sharak rit ban pynshai mynmiet. “Kim ju thang ia ka sharak bad buh ia ka hapoh ka shang hynrei ha u dieng pynieng sharak te kan pynshai ia baroh hapoh kata ka iing”. Mynshuwa ki ju thang sharak bad shna ruh ia u diengpynieng sharak khnang ban shai ka kamra baroh kawei khamtam ha ka por ban shet ban tiew ban bam ban dih.
Kumta ka jingshai ka long kaba donkam la ka long ka barit ne kaba heh, ka jingshai te ka jingshai la kumno kumno ruh.
Namar kata u Jisu Khrist u kwah ba kito baroh kiba la ngeit ki nongbud jong u ban long ka jingshai ha kaba kynja mynsiem ban pynshai ia kiwei pat kiba don hapoh jingdum ki bym pat tip ia ka jingshai ka jong u Blei bad ba kata ka jingshai ka jong u Blei kan ioh tyngshain ha ki briew baroh.
Namar kata, “To pynshai kumta ia ka jingshai jong phi HA KHMAT KI BRIEW BAROH, ba kin iohi ia ka jingleh babha jong phi bad ioh iaroh ia u Kpa jong phi UBA HA BNENG” Mathaios 5:14-16.
Te lada kiba ngeit baroh kin pynshai kumne ia ka jingshai jong ki ha khmat kane ka pyrthei badum u ban ioh jingiaroh, dei u Kpa jong ngi uba ha Bneng (U Blei).