Ka MJACCV, ka leit dawa pynkiew bai kali na ka sorkar, ha u paidbah, ka ong pynhiar bai petrol

Shillong: Ka Association jong ki nongniahkali kiba don lang ha ka lama jong ka All Meghalaya Commercial Vehicle and Owner Driver Assiociassion ki la pynrem jur ia ka jingkynthoh jong ka Meghalaya Joint Action Commitee of Commercial Vehicle, hadien ba ki la leit ban ia kynduh ia ka Deputy Commissioner ka East Khasi Hill ban dawa ban pynkiew ia ka bai shong kali.

Haba ia kren bad ki lad pathai khubor, na ka liang u President jong ka Rynjah Taxi service Assiociation u bah Pynsuk D.Iuroi, u la ong ba ka jingleit jong ki ban kynduh ka long hadien ba ki la dep ban phah ia ka dorkhas jong ki, ha ka 14 tarik u bnai rymphang 2021 ia u Commissioner jong ka tnad Transport ban dawa ban pynkiew noh ia ka bai shong kali ka ba khlem pynthymmai la 11 snem mynta. U la ong ruh ba tang hadien ba ki la wan ia kren bad ka Deputy Commissioner, ka la mih ka jingkynthoh na ka MJACCV, ha kaba ki la kynthoh bad pynrem jur ia ka AMCVODA bad ka jingkynthoh pyrshah ia u President rangbah ka Associacion, tang namar ba ki la leit ban ia kren halor ka dor shong kali. La ong ba kane ka jingkynthoh ka long ka ba bakla bad ka bym lah pdiang namar ba ym tang kane ka seng ka ba la leit ban dawa ban kyntiew ia ka bai kali hynrei wat ka MJACCV ruh ka dei ka wei na ki seng ki ba la leit ban buh dorkhas ha ka sorkar ban dawa pynkiew ia ka bai shong kali. “Ha ka 1 tarik u bnai ba ar ka MJACCV ka la leit buh ia ka dorkhas ha u Symbud myntri rangbah ka jylla u bah Prestone Tynsong, ha kaba ki la dawa ban pynthymmai noh ia ka bai shong kali bad lait na kane ki khlem dawa eiei na ka sorkar, hynrei ha ki jingialang paidbah ki pynpaw ba ki kwah ba ka pynhiar ia ka dor jong ka petrol bad Diesel bad ka tax ka ba iadei bad ki kali” u la iathuh. U la ong ruh na ka liang ka AMCVODA kam don jingiadei eiei bad ka MJACCV ha ka ba ka jingdawa jong ki long ban pynhiar ia ka bai petrol, katba ka AMCVODA ka dawa ban pynthymmai noh ia ka baishong kali ka ba khlem pynthymmai mynta la 11 snem bad ki la pynpaw ruh ba ka jingshem jingeh jong ki nongniah kali, ka dei ka jingkiew ka umphniangm hynrei ruh kawei ka long namar ka jingioh duna palat ka tulop, kaba haduh kine ki kynti ka tulop jong ki, ka long tang T.3000 shibnai bad kane ka la wanrah ia ka jingeh ban bsa ha ki ing ki sem.