Ka miet ba ngiew jong ka jing iakhun ki shipai India, China ha Ladakh

Ka jingiap jong ki shipai India bad ki shipai China, ha ka miet jong ka Lah Sngi U Blei, ka dei na ka jing iakhun ba mar met bad ba da para kti, ong shuh ki khubor, ba la ioh lum.

La iathuh ba ka jing iakhun, ka la neh haduh phra kynta ha ka miet jong ka Lah Sngi U Blei bad ki shipai Peoples Liberation Army (PLA) jong ka China, ki pyndonkam da ki nar, da ki tdong suloi bad kitei ki leit tur beit beit sha ki shipai jong ka 16 Bihar Regiment, ong ka khubor jong ka News 18.

Ha katei ka jing ia khun para kti ha them Galwan jong ka Ladakh, la iathuh ba 23 ngut ki shipai jong ka India, ki la iap, ba kynthup ia U Commanding Officer jong ka 16 Bihar Regiment, U Colonel Santosh Babu. Ka jingiap jong kiba bun ki shipai, la iathuh ba ka dei ruh, namar ba ki don ha ka jaka, kaba ka jingkhriat ka jur bha. “Wat ia kito kiba phet rieh ialade ruh, la beh thong bad la pyniap” ong u heh shipai, ha katei ka tyllong khubor. La iathuh shuh ba kitei kiba iap, ki kynthup ruh ia kito kiba kynthih ialade sha ka wah Galwan.

Haduh mynta, ki don kumba 24 ngut eiei, kiba don ha ka jing shitom kaba jur bha bad kiba don ha ki jaka sumar bad sa 110 ngut kiba dei ban ioh jing sumar kyrkieh, ha kaba la iathuh ba ka jingiap, kan lah ban kiew ha ki sngi, ban sa wan.

Ka jing ialeh, ha katei ka miet, ka long hadien ba ki shipai, ha ka jing ialam u Colonel Babu, ki leit pynpra ia kawei ka iing jain, ba la pynieng da ka China, ha ka jaka, ba latip kum ka Patrol Point 14. La pynpra ia katei ka iing jain, hadien ka jing ia kynduh jong U Lieutenant General Harinder Singh, uba khlieh ia ka kynhun shipai XIV Corps ha Leh bad U Major-General Lin Liu, u heh shipai jong ka Xinjiang military district.

Ka jingthaw ia katei ka iing jain, la iathuh ba ka dei ha Patrol Point 14 bad ka dei hadien ar sngi, ba ka la don ka jing ia kynduh jong ki heh shipai, na ki ar liang mamla ha Chushul bad katei ka iing jain, ka dei ha ka jaka kaba la kam trai da ka India.

Ki shipai India, ki la dawa ia ka China, ba kan weng ia katei ka ktem jongka, hynrei, haba kam treh, kumta la thang noh ia katei ka ktem bad mar kumta, ka sdang ka jing ia pyni bor bad ba ki shipai ka China, ki kynnoh ba ki dei ki shipai ka 16 Bihar Regiment, kiba thang ia katei ka ktem. Ki shipai China, ki la kawang ia ki shipai India, da ki maw kiba heh, namar ba ki don ha ka jaka, kaba kham ha jrong.

Ki shipai China, ki la aiti noh hynnin ka sngi, ia ki met iap jong kiba bun ki shipai sha ka India.

Kane ka jingjia ha kane ka kynti, ka dei ha ka sien ba nyngkong, hadien u snem 1967, ha kaba 88ngut ki shipai India, ki la iap bad sa 340 ngut ki shipai PLA, ki la iap, ha ka jing iakhun ha Nathu La bad Cho La pass, kiba dei ki jaka ba pyn iasnoh ia ka them Chumbi.