Ka metiap ba la ioh tam, dei ka samla na ka shnong Siejlieh

Nongstoiñ, 27 Lber:
Tang hadien 1 sngi ba la ioh ban tam ia kawei ka met iap kaba la pyut bad shah tep ruh ha u shyiap jong ka wah Umpniang kaba don kham harum ia ka madan Nongpathar Pyndengrei, ki pulit ka Nongstoin ha ka sngi nyngkong jong ka taiew ki la lap bad la lah ruh ban pyntikna ia ka kyrteng bad ka jaka sah jong katei ka met iap.
U bah S. Nongtnger Superintendent of Police ka West Khasi Hills ha ba ia kren bad u nongthoh khubor u la iathuh ba katei ka met iap ka dei jong kawei ka samla kaba la tip kyrteng kum ka Daritngen Syiem Shangoi 19 snem ka arta na ka shnong Siejlieh West Khasi Hills District. Shuh shuh u bah Nongtnger u la ong ruh ba la lap ba katei ka samla kala jah nala iing la kumba 1 bnai ei ei bad katei ka samla ka dei ka khun swet bad ka sah tang bad la u para jong ka u ba dang 15 snem ka arta ha katei ka shnong Siejlieh kaba jngai tang kumba 2 KM ei ei na ka sor Nongstoin.
Hadien ba ki pulit kila dep ban leh ia ki jingdonkam baroh la aiti noh ia katei ka met jong katei ka Samla sha ki ba ha iing ha sem bad pyndep ia kaba sah, bad ki pulit ki dang pynlong ka jingtohkit ban lap ia ka daw jong ka jingiap jong katei ka samla.