Ka Meghalaya Literary Assembly

Kyrsoibor Pyrtuh

Ka kyntien “literary” ka mut ka thoh ka tar, hynrei kane ka jingїathuh khana hangne kam dei shaphang ka Seng ki nongthoh kot lymne ka jingїalang halor ka thoh ka tar. Kane ka jingthoh ka dei shaphang ka jingїatai nia kaba la jia ha ka Jingїalang Dorbar kaba nyngkong jong ka Їing Dorbar Thaw Aiῆ ka Jylla ha ka snem 1972. San phew snem mynshuwa ka Duwan jong ka Synshar Paidbah ha Meghalaya ka shlei da ki briew kiba proh, kiba shemphang bad kiba tip. Ym lah ruh ban klet ia ka jingnoh synῆiang jong ka Percylinda Marak, kaba long tang ma ka ka Nongmihkhmat kynthei.

Hadien ba la jied ia u Prof R.S Lyngdoh kum U Shongknor ka Їing Dorbar Thaw Aiῆ, I Paiem Jormanick (MLA) iba la pynїaid ia ka elekshon I la kynthoh kumne, “baroh ngi tip ba u Prof R.S Lyngdoh u dei u riewstad uba tip bniah ia ka history jong ka Riti Synshar, kaba long ka spah bah bad kan їarap ia u haba u pynїaid ia ka Dorbar…” Kiwei de ki Nongmihkhmat ki la pyrto ia ka jingshemphang jong u Shongknor ba nyngkong ka Jylla. U Bah Hoover Hynῆiewta u ban jur ba ki MLA baroh ki la mon lang ban tynrong ia ka jingkit ha ki tyrpeng ba khraw jong u Prof R.S Lyngdoh. U la ong, “Shongknor ba don burom, phin seng nongrim ia ka synshar paidbah ha kine ki lum…bad phin dei u Shongknor uba nyngkong jong ka Jylla ba pura u ban dro ia u laiῆ hapdeng ka seng saiῆ hima kaba phi don bad ka jingkyntang jong ka shuki kaba phi shong. Shongknor, nga ngeit phin lah ban pynїaid ia ka Dorbar ha ka rukom kaba beit bad ryntih bad jingїaburom mar kylliang hapoh ka їing dorbar bad shabar ruh kumjuh”. Ki longshuwa jong ngi ki la pyrshang ban tei bad їai neh ha ka nongrim, hynrei ka bamsap, ka tuh ka thiem bad ki kam runar ki la tyllep bad pynjot thiaw ia ka synshar khadar bad ka akor ka burom ha ka imlang sahlang.

Ka Їing Dorbar Thaw Aiῆ kaba nyngkong jong ka Jylla ka shlei da ki Nongmihkhmat kiba tip, kiba shemphang, kiba nep ka jingmut jingpyrkhat bad kiba pnah. Na ki bui jong ka Assembly, lah ban pynshisha ba ki jingїatai nia ki long kiba shong sbai bad ka dei ban ktik ia ki samla pule ban thud bniah. Naduh ka sngi nyngkong ngi sakhi ba ki Nongmihkhmat ki pynlut por ban їatai nia wat halor ki jingmut jong ki kyntien ne ka senten. Ka jingїatai nia ka long kaba jyliew bad shitrhem namar ki Nongmihkhmat kiba shemphang ki sei la ki nia ki jutang bad ki ia biria pynrem iwei ia iwei bad tei ia ka Jylla kaba thymmai.

Ym don mano mano ruh kiba don hok ban bishar ia ka jinglah ne ka jingbym lah jong ki Nongmihkhmat kiba mynta hapoh ka Їing Dorbar Thaw Aiῆ, hynrei shabar ka Їing Dorbar te ngi їohi ia ka jingthylli jabieng jong ki, ym tang katta, ka akor ka burom ruh ka la hiar bad ym don nongrim lymne saiῆpyrkhat. Ha ka rynsan saiῆ hima kiba bun ki shu їakyrkiw kyrkaw kum ki khyllung-khynnah. Ňiuma, ka don pat ka jingkyrmen namar ba shen kin sa mih ki khmat thymmai, kiba kloi ban len lade bad kiba shemphang, ki ban sa ai reng ha ka elekshon 2023 khlem ka jingkyrshan jong ki Seng saiῆ hima kiba la rim (la ki long kiba na Ri thor ne napoh Ri Lum). Hoid, kin sa mih ruh kiwei ki khmat kiba la nang la stad bad kine ki kren shaphang ka jingkylla, phewse ka jingkylla aiu ki kren ym don ba peiphang bad kine pat kin їakhun hapoh ka jingkhmih jong ki Seng saiῆ hima kiba la satah bad ki bym don nongrim bad kiba ki nongїalam jong ki ruh ki long ki bym larkam bad ka pyrkhat pyrdaiῆ kaba sahdien. Kumta to ngin kyrshan ia ka kynhun bad ki riewshimet kiba thymmai, kiba shai ka jingmut jingpyrkhat, kiba don buit, kiba don ka jingsngewthuh kaba shai halor ki issue bad ruh kiba da ki phew snem ki la їakhun bad їaksaid ha madan halor ki ishu bapher bad kiba їeng ha ka nongrim ka hok bad jingshisha.

Mynta ngin poi sha ka khana kaba nga kwah ban їathuh bad ka dei shaphang ka jingїatai nia halor ka jingmudui pyrshah ia ka Kot khubor Ka Pyrta U Riewlum. Hadien ka jingjied ia u Shongknor ka Їing Dorbar Thaw Aiῆ, katei ka kot khubor ka la pynmih ia ka khubor kaba pynthoh bria ia ki katto katne ngut ki MLA bad kynnoh ba ki pynwit ia ka elekshon jied Shongknor kaba la long ha 29 Lber 1972. Ynda ka Їing Dorbar ka la shong Dorbar biang ha u Їaiong, u Prof Martin Majaw u la mudui pyrshah ia ka kot khubor halor ka nongrim ba ka la ῆiew thala ia ka dor jong ki Nongmihkhmat. Ka jingthoh ha ka kot khubor pyrshah ia ki MLA ka long kumne, “Ha ka por ba shim ia ka bynta ba nyngkong da u Acting Speaker, Bah Jor Manik Syiem ban jied ia u Speaker, la don ka jingkaw-kaw bad jingpynwit da u Bah D. D Lapang, Bah H.Hynῆiewta bad Bah M.N Majaw kiba long ki opposition”.

Kaba bud nangta ka long ka jingїatai nia kaba don dor bad ka Їing Dorbar ka la їatai nia halor ki kyntien bad ki jingmut kiba don ha ki, khamtam eh ia ka jingpynkylla sha ka ktien phareng. Lah ban mutdur haduh katno ka jingkhraw kata ka jingїatai nia haba u Shongknor uba dei ruh u nongthoh kot Khasi bad u nonghikai history uba paw nam u shah skhor ia ki nia ki jutang ba ki MLA ki khlei bad ki MLA ruh kim dei kiba komti, pynban kiba pnah, kiba proh bad kiba khraw jabieng. Kum u nonghikai skul, pateng pateng u Shongknor u tynruh da ki jingkylli ia ki MLA kiba їashim bynta ha ka jingїatai nia bad kumta ka jingїatai nia ka nang khraw shuh shuh. Kane ka jingїatai nia ka tyllun pyllun ia ki kyntien Khasi kiba la pyndonkam ha kata ka khubor, kum ka jingmut jong ka jingkaw-kaw bad jingpynwit bad ka jingpynkylla phareng ia ka khubor.

Ban їalam jingmut ia ki nongpule bad ailad ia ki ban pyshai shynna hi da lade halor kane ka jingїatai nia, ngan pyrshang ban їathuh ia ka jingїatai nia kumba la buh jingthoh ha ka bui jong ka Їing Dorbar Thaw Aiῆ ka Jylla kumne harum:
U Shongknor- “Mynta u Prof Majaw un buh ia ka jingmudui pyrshah ia ka kot khubor, “Ka Pyrta Riewlum” katkum ki kyndon jong ka Їing Dorbar. Mar kumta hi, u Shongknor u tynruh ia u nongmudui da ka jingkylli, “hato ym dei ba u Nongmihkmat ba don burom u pynkylla ktien hi da lade? Bad u nongmudui u jubab ba ia ka jingpynkylla ktien la leh da ki nongtrei jong ka Assembly bad ma u ruh u pdiang ia ka jingpynkylla ktien kumba ka long. Kumta ka jingїatai nia ka sdang rhem bad u Prof Majaw ruh da ka jingsngewskhem u pynphai nia shar shar. Shuh shuh, u Shongknor u la kylli, “Na kano ka thymmei phi pynkylla phareng ia ka kyntien jingkaw-kaw bad jingpynwit ba phi ong ba ha ka ktien phareng kine ki kyntien ki thew ia ka jinglong khlem akor bad ki jingkren blap blap ki bym shongdor ei ei ruh em.” U Prof Martin u la jubab, “Shongknor ba don burom, ka jingpynkylla ktien ka don ar jait, kawei ka long ban ai ia ka jingmut ba shisha jong ka ktien bad kaba ar pat ka long ban ai ka jingsngewthuh halor ka jingmut jong ka ktien…bad Shongknor, nga dei u Khasi bad ngam donkam ban wad thymmei ban sngewthuh ia ka jingmut jong ka ktien jingkaw-kaw.” Hynrei u Shongknor u la woh nia biang, “Wat u phareng ruh u hap ban peit bad twad jingmut na ka Chamber Dictionary.”
U Bah Brington Lyngdoh ruh u la їashim bynta ha ka jingїatai nia bad wanrah ryngkat ia ki ar tylli ki dictionary ba la thoh da I A.S Shylla bad Nissor Singh. U Bah Bring u la kynthoh ba ki kyntien jingkaw-kaw bad jingpynwit ki long ki kyntien kiba jem ban sngewthuh bad kam donkam satia ban pynkyllaiῆ ne thep jingmut da kumwei pat bad u nongmudui u la їalam bakla ia ka Їing Dorbar.

Kiwei ki Nongmihkhmat, kum u Bah Ripple Kyndiah bad Bah Maham Singh ruh ki la їashim bynta, katba u Bah Hoover Hynῆiewta u la sei madan ia ki nia riewstad bad kyntien birai dei por jong u, kaba la wanrah ia ka jingїarkhie їapler hapoh ka Їing Dorbar. U Bah Hoover u la їasaid nia tyngeh kumne, “Shongknor ba don burom, kam shym don kano kano ka jingkaw-kaw ha kato ka sngi…Lada na ka jinglong tynrai ka met u briew kum u bah Majaw bad ma nga ki briew kiba heh sur bad ba phi ruh phi la ailad ban kren, Shongknor ba don burom, ia kata ka jingheh sur ym lah ban ῆiew ba ka dei ka jingkaw-kaw…kumta ia ki briew kiba heh ka sur ym dei shuh ban shah ba kin їaleh elekshon…kam don ka kaw-kaw, kumba ki ong bad kumba ki mut ban kynnoh ba ngi dei ki briew kiba khlem burom bad kiba khlem akor.”
U Shongknor u la pynkut noh ia ka jingїatai nia da kaba ong, “kane ka donkam ruh ia ka jingїatai jong ki stad kot” bad u la phah ia kane ka kam sha ka privilege committee. Lada jia ba ka ktien Khasi ka їoh ia ka jingithuh katkum ka khyrnit ba phra ka Riti Synshar ka dei namar ba don kum kine ki Nongmihkhmat ha ka Їing Dorbar Thaw Aiῆ bad ka imlang sahlang ne ka Jylla kan kiew shaphrang lada ngi jied da ki briew kiba shemphang kaei ka art, kaei ka poitri bad kiba tip bniah ia ka history, ym ki briew kiba bamsap bad kiba khwan myntoi shimet.

(U Prof R.S Lyngdoh u dei u nongthoh kot bad nongsdang jong ka tnat pule Khasi ha skul bah NEHU. Katba u Prof Martin Majaw u hikai English ha St Anthony’s College bad u Bah Hoover Hynῆiewta u dei u nongkren paidbah uba pnah bad proh jabieng).