Na ka Jingpynthei bom jong ki ’riew pyntriem ba khieñduh ha kane ka Easter Sunday ba la dep ha Sri Lanka, ka AJYWO Central Body, ka la dawa jur na ka Sorkar Meghalaya bad ki Dorbar Shnong ba ki dei ban kyndit bynriew noh na ka bai oh thiah ban peitngor bha ia ka rung ka mih bad ka shong ka sah beaiñ jong ki briew kiba nabar ha ki shnong ki thaw bad ruh hapoh u pud u sam jong ka Jylla baroh kawei khnang ban yn lah ban kiar ne iada na ki jingma kiba ap ia ka Jylla bad ki trai ri trai muluk rit pait ha kiba bun rukom.
Ka Meghalaya, kadei kawei na ki jylla ka Ri India kaba suk bha ban shah hiar thma na ki kam pyntriem jong ki ’riew kheiñduh (suicide bomber terrorists) kumba la jia ha Sri Lanka, Spain bad ha kiba bun ki bynta jong ka India bad ka pyrthei. Ka Sorkar Meghalaya ka dei ban kyndit bynriew noh mynta.
Ka jingbym shim khia ka Sorkar Jylla mynta la 47 snem ba ngi la ioh Jylla, ban thaw ia ki aiñ kiba pyrkhing ban tehlakam ia ka jingwan tuid kyrthep bad shong sah ki briew kiba nabar hapoh ka Jylla ka long ka daw bah ka ban buh ha ka jingma ia ka Jylla na ki kam pyntriem kiba lah ban jia ha kano re kano ka por bad ruh ka ban sa ktah ia ki trai ri trai muluk rit pait hadien habud” ong shuh u Bah Reachingson Siangshai, Vice President jong ka AJYWO Central Body.
Ka Jaintia Hills, khamtam ha East Jaintia Hills kadei kawei na ki thiañ ha ka Jylla Meghalaya kaba jur bha ka jingwan kiew kyrthep jong ki nongwei ki bym ithuh ithaw shuh. Ngim tharai ba ka Sorkar Jylla lane ki Dorbar Shnong kum ha ki thaiñ Jowai, Phramer, Ladrymbai, Khlieriat, Sookilo, Sutnga, bad Elaka Narpuh bad kiwei kiwei de ki thaiñ ba kin ioh jingkheiñ lane tip lut ia kine ki nongwei, la ki dei ki ei? Ki wan nangno? Ki sah haei? Ki wa leh aiu hange ha Jaintia Hills bad kumta ter ter” ong shuh shuh u kyrwoh na AJYWO.
Ka AJYWO ka la ong shuh shuh ba, na kawei ka sorkar sha kawei pat, ka por jong ki, ka kut tang ha ka ia kawang ktieh kawei ka political party ia kawei pat. Ym don kano kano ruh ka sorkar kaba patiaw ia ka iap ka im jong kit rai ri trai muluk rit paid jong ka Jylla haduh mynta kaba la treh shisha ban wanrah ia kita ki aiñ kiba pyrkhing na ka bynta ban tehlakam ia ka rung ka mih, bad ka shong ka sah be-aiñ jong ki nongwei ha ka Jylla.
Shaei ki 60 ngut ki nongmihkhmat jong ka Jylla kiba ngi lah jied? Don aiu shalyndet kaba pynlong ia ki ban kyllaiñ jelabi barabor na ka por sha ka por halor ka jingiaid dawa jong ki sengbhalang ka Jylla ban thaw ia kiba kum kita ki aiñ ba satar na ka bynta ka jingmyntoi jong ki trai ri trai muluk rit pait ka jylla.
Kaba sngewsih mynta ka long ba, lada kum ha kane ka dur, ka Sorkar Meghalaya ka trei kam na kawei ka sorkar sha kawei pat mynta la 47 snem, kat kum ka rukom long rukom man mynta, kan ym slem shuh ba ka ka jylla Meghalaya ba kan sa kylla long kum ka Jylla Tripura.
Ban thaw ia ki aiñ ba ia dei na ka bynta ka tulop, allowances, bad kiwei kiwei de kiba dei na ka bynta ka jingmyntoi jong ki nongmihkhmat jong ngi, ka shim por tang ha ka shisien shong Assembly katba ban thaw ia ki aiñ ki ban iada ia ki trai ri trai muluk rit paid jong ka jylla mynta la 47 snem ba ngi ioh la ka jylla ruh ka sorkar kam pat lah satia. Tang ia ka Meghalaya Residents Safety and Security Act-2016 ruh kaba la sdang shna naduh u snem 2014 ruh, haduh mynta ym pat lah ban pyntreikam ia ka.
Ko Sorkar Meghalaya! Ynda ngi la long kum ka Tripura bad ynda lah wan ka sorkar hange ha Meghalaya ka bym dei shuh ka jong ki trai ri trai muluk ka Jylla, hangta phin sa iohi ba tang ha ka shikyllipmat kin sa thaw ia ki aiñ ba pyrkhing jong ki bad pyntrei kam pura ruh ia ki na ka bynta ka jingbha ka miat jong ki briew jong ki hi, ki bym dei shuh kit rai ri trai muluk jong ka Meghalaya.
Shwa ba ka um kan poi ha ryndang, ka AJYWO ka kyntu iaki Dorbar Shnong ba kim dei shuh ban dang iai ap sah tang ha kita ki aiñ tehlakam mynder ri jong ka sorkar Meghalaya ki bym ju dep thaw shuh lano lano ruh, hynrei ki dei ban pyndonkam la ka bor bad ka iktiar jong ki ban shim hi ia la ki jingkit khlieh ha ka ban peit ngor bad tehlakam bha ha la ki jong ki jong ki shnong ki thaw ia ka rung ka mih, ka trei ka ktah bad ka shong ka sah beaiñ jong ki nongwei kiba wan kiew kyrthep man la ka sngi khlem kut shuh sha kane ka jylla jong ngi, pynkut u kyrwoh na ka Seng.
Mr. Reachingson Siangshai
Vice President,
AJYWO Central Body: Jowai.
Ka seng ajywo kala dei ban leh kyrkieh da ka kam,sam da ki notice ha kylleng ki nongkyndong bad kyrpad ban pynlong da ka public meeting ha kylleng ki shnong, khnang ba ki paid ka bri u hynniew trep hynniaw wasa kin ioh jingpynshai ,khnang ba kan ym mih jingkulmar ha dien,