Ka Meghalaya kam dei ka ktem tuh bniat hati

Shillong, 21 Risaw:
Wat la ka jylla Meghalaya kam dei ka ktem ia ki nongpyniap ia ki hati ban sei ia ki bniat jongki hynrei ka dei ka lynti ia ki nongtuh bad nongpyniap hati ban pyniaid iew shabar ri kum sha Bangladesh, Myanmar bad Burma.
“Ka jylla Meghalaya ka dei ka lynti iaid ia ki nongkhaii tuh ia ki bniat hati watla kam dei ka jaka ban ioh ia ki bniat hati”, la ong u Chief Conservator of Forest (Wildlife) u Bah YS Shullai.U la ong ba haduh mynta ym don kano kano ka jingjia ba pyniap bad shalan ia ki bniat hati ha kane ka jylla.U Bah Shullai u la ong ba ka jylla Meghalaya ka don khappud bad ka ri Bangladesh bad ka lynti iaid sha kiwei ki ri, ka la pynlong ia ki nongkhaii tuh ia ki bniat hati ban pyndonkam tang kum ka jaka iaid ban poi sha Assam, Mizoram bad Nagaland ban poi pat sha ki ri kum ka Burma bad Bangladesh.“Ia ka thain mihngi ka India la niew kum ka jaka pyniaid iew ia kine ki kam beain ha kaba la shalan wat shaduh ri Japan ha ka dor kaba rem bha ” la ong u CCF Wildlife.U la ong ba ka tnad Wildlife Crime Bureau ka la ioh kem bun ngut ki briew kiba donkti ha kane ka kam tang um kwah ban ai ia ki jingtip ba bniah.“La don ki khep ha ki snem 90 haba ia ki nongkhaii bniat hati ki la shah kem ha kane ka jylla kiba thmu ban pyniaid iew haduh 12 kilo ki bniat hati bad shong dor da ki phew lak”, u la ong.