Shillong:Da ka jingai jait sha ka kmie, ha kaba ki khun kynthei ki ïoh pateng ïa ki jingdon jingem bad ki khun ki shim jait sha ka kmie, lah ban antad ne shim ba ki jylla Meghalaya, kaba long kaba itynnad, kan leh bha ha kaba ïadei bad ka jingïalong ryngkat hapdeng ki kynthei bad shynrang.
Hynrei ha kawei ka liang, katkum ka jingthoh ba la shon ha ka sien nyngkong halor katei ka jingpyrkhat, jong ka Niti Aayog’s North Eastern Region District Sustainable Development Goal (SDG) Index, kaba thew ïa ki jinglehbha jong ki thaiñ shateilammihngi halor kiba bun ki kam ka ïoh ka kot bad ka roi ka pa ha ka jinglong briew, ka la kdew ba ka Meghalaya ka dang ïaid ha ka lynti kaba duna bha halor ka jingïaryngkat hapdeng ki kynthei bad shynrang.
Baroh 11 tylli ki Distrik ki la don ha ka jingïoh poiñ kaba long hapdeng ka 36-59, kaba hab hapoh ki kyrdan ka jingthew ban poi sha ka thong ne ‘aspirant’ lane hapoh ka jingpyndep ne ‘performer’. Ïa baroh ki Distrik la buh hapoh ki 4 kyrdan, ka aspirant (0-49), performer (50-64), ba dang ïaid ban jamshakhmat ne front-runner (65-99), bad ki ban poi sha ka thong ne achiever (100).
Ha ka thup jong ki 103 tylli ki Distrik ki jylla kane ka thaiñ shateilammihngi, 13 tylli kiba hajrong kyrdan eh ki long na Arunachal Pradesh kiba la ïoh poiñ hapdeng 93 bad 99 (front-runner). Baroh 4 tylli ki Distrik ka Sikkim ki la ïoh poiñ hapdeng 83 bad 92.
Ka jingleh bha jong ki Distrik ka Assam ki ïapher hapoh ka kyrdan front-runner, kaba lehbha tam dei ka Karbi Anglong (87), bad kaba duna tam dei ka Dhubri (65). Baroh 8 tylli ki Distrik ka Tripura ki hab hapoh ka juh ka kyrdan, ki la ïoh hapdeng ka 86 bad 74, katba ki 14 tylli ki Distrik ka Nagaland, 11 tylli ki la shah buh ha ka kyrdan front-runner, da kaba ïoh poiñ hapdeng 80 bad 71.
Baroh ki Distrik ka Meghalaya ki don hapoh ka kyrdan kaba sha traiduh jong ka jingbuh jingkheiñ, kaba la ïoh paralok bad ka Mizoram, ha kaba baroh ki Distrik ki la long kiba duna palat.
Ka Niti Aayog ka la pynlait ïa ka kaiphod kaba nyngkong halor ka jingkhmih bniah ïa ka thaiñ shateilammihngi kaba kynthup ïa ki 8 tylli ki jylla, ka Assam, Tripura, Sikkim, Meghalaya, Mizoram, Manipur, Nagaland bad Arunachal Pradesh.
Katei ka kaiphod ka shim ïa ka jingkheiñ halor ka jingïaryngkat kyrdan hapdeng ki kynthei bad shynrang kaba long ruh katkum ki 5 tylli ki jingkdew lynti, kawei kadei halor ka jingshah thombor ki kynthei kaba long katkum ka jingbun ki kynthei kaba hapoh ka 10,000 hajar ngut, ka jingkheiñ ki kynthei shynrang ha ka por ba kha, ka percentage jong ka jingshah leh beijot pyrshah ïa ki kynthei, ka jingdon ki Self Help Groups (SHG) ki kynthei kiba don bynta ruh ha ki kam kynshew pisa.
Ka West Garo Hills ka jylla Meghalaya ka la long kaba lehbha kaba la ïoh poiñ 59. Pynbud sa ka West Khasi Hills, West Jaiñtia Hills, East Jaiñtia Hills bad South Garo Hills ha ka kyrdan 54, East Garo Hills ha ka kyrdan 53, Ri Bhoi ha ka kyrdan 51, East Khasi Hills ha ka kyrdan 50, bad North Garo Hills ha ka kyrdan 49.
Katba ka South West Garo Hills bad South West Khasi Hills ki la long kiba duna tam ha kaba ki la ïoh poiñ 47.
Lah ban ong ba ka Meghalaya ka don lai tylli ki jaitbynriew riewlum, ki Khasi, Garo bad Jaiñtia, baroh kidei kiba ai jait sha ka kmie, bad lehse kan dei ka jylla kaba khatduh tam ha ka pyrthei kaba dang ïaid ha ka dustur riti ai jait kmie.
Phi dei ban tip noh naduh mynta bad wat nym ialam bakla hi ruh ia ki paidbah ka bri u hynniew trep…ba ki Khasi bad jaiñtia ki dei ki juh ki jaitbynriew hynrei shu pher tang ja jaka ba ki sah…Kum ki Bhoi, ki War, ki Maram, ki Lyngngam bad ki Jaiñtia baroh ngi long kawei ka jaitbynriew… Ka jaitbynriew kam shem la hiar dor na ka ai jait kme, hynrei ka hiar na ki kam pap kam sang ba ngi leh…ngim shym la kheiñ kor ia ka hok kasot ban kyntiew ia ka jaitbynriew
Khublei 🙏🙏🥰