Ka MDA ka wanrah kam pynroi, tang da ka ktien bad kular thok, ong ki heh Congress

Shillong:Ki nongïalam ka Congress ha ka jylla, mynhynnin ka Sngi ki la ther tyngeh ïa ka Sorkar synrop ka MDA ba ka wanrah ki kam pynroi tang ha ka ktien khlem ki kam bad tang ki jingkular thok.

“Ka Congress kam kwah ban thaw ki jingkular thok hynrei ban treishitom na ka bynta ka bha ka miat ki paidbah,” ong u Mathew Anthony AICC incharge Education haba kren bad ki lad pathai khubor.
Katba u Saleng A Sangma MLA ka NCP uba la pynïasoh Congress u la ong ba u pynïasoh sha seng namar ka don ka rynsan kaba heh bad lah ban ïatreilang ban ïoh jingjop babun.

“Nga la ïohi ba ka Sorkar MDA ka la shu ai ei ïa ki jaka khappud ba khlem don jingïakajia sha ka Assam. T 4 hajar klur la pynphai biang sha Delhi khlem pyndonkam balei ngim lah pyndonkam ïa kane ka pisa,” ong u MLA ba iehnoh kam u Saleng A Sangma.
Haba kynthoh ïa u nongïalam ka TMC uba dei ruh u nongïalam barim ka Congress u Dr. Mukul Sangma u Saleng u la ong, “Hato la ju don mo mano mano ban ïaineh kum u MLA marwei haduh bakut, hato u Mukul u lah mo ban ïaineh marwei, hynrei em balei u ieh ïa ki paidbah shiteng hynrei u la ieh ïa ka Congress ban ïasoh sha ka TMC ryngkat ka kynhun ym marwei.

Haba kylli kumno u ïasoh biang sha ka Congress wat hadien ba u la shah beh seng bad duh tiket ha u 2018, u Saleng u la ong, “Nga la long u lanot ha ki por mynshwa hynrei mynta ba kim don shuh ki nongïalam barim kiba khawpud ki bym lah ban ïaineh kiba ïohi ba ka jingdon jong nga uba pyrshah ïa ki rukom treikam jong ki kan long ka jingma ïa ki, kumta nga la wanphai biang namar ka jinglong ba sngewrit u President ba mynta ka Congress kumta ha kane ka seng kan ai ka lawei kaba bha.”
Haba kylli ba haba u don hapoh ka sorkar ban peit ruh ïa ka Implementation Committee bad ba um kren eiei shaphang ki High Level u Saleng u la ong, “Haba nga don hapoh ka Bus nga shah khyñiat shadien bad khlem shuki kumno yn ong shaphang kita ki high level.”

Katba u President ka MPCC u la ong ba da ka jingwan kine ki arngut ka Congress kan khlaiñ ka nongrim naduh Jaiñtia Hills shaduh Garo Hills bad jylla baroh kawei.
“Shen ka seng kan sa pynbna shuh shuh ïa ka kyrteng ki kyrtong ki ban aireng ha ka ilekshon la kumno kumno hadien ka 25 tarik mynta u bnai,” ong u ma Vincent H Pala sha ki lad pathai khubor.