“Ka MBOSE ka pyntroin ia ka Ktien Khasi, ka NEHU ka pynkhlain” La dei ban hikai Khasi haduh Klas XII: Dr DRL Nonglait

Shillong, 28 Nailar:
Ka jingpynduh noh ka Meghalaya Board of School Education (MBOSE), ia ka sobjek MIL Khasi ha ki klas XII, naduh u snem ban wan, kan ktah khamtam ia ki khynnah bad ki samla pule. Katba ka skul bah NEHU, ka ithuh bad ka pynlong kompolsori ia ka Khasi hynrei ka MBOSE pat ka la thmu ban pyntroin ia kane ka ktien Khasi.
Haba iakren mynta ka sngi bad u President ka Khasi Authors Society (KAS) u Dr DRL Nong lait, uba dei ruh u nong hikai Khasi ha skulbah NEHU, u la ong ba kane ka jingleh jong ka MBOSE ban pynduh noh ia ka sobjek Modern Indian Language (MIL) khasi ha ki klas XII kkan ktah shibun eh ia ki khynnah pule.
“Ha ka jingshisha ka MBOSE ka la dei ban pynmih ia ka jingbthah ba dei ban hikai da ka ktien khasi ha baroh ki sobjek naduh klas Primary haduh klas XII”, la ong u Dr Nonglait.
U la ong ba ka jingpynlong elective sobjek ka MBOSE ia ka Khasi MIL, kan ktah ia ki khynnah bad ruh ia ka ktien Khasi. U la ong ba wat la ka MBOSE ka la pynduh ia ka MIL Khasi, hynrei ha NEHU ki Khasi ka long kompolsori beit ha kaba baroh ki khynnah pule Science, Commerce bad Arts kin hap ban thoh ia ka sobjek Khasi kum ka compolsori sobjek.
Kane ka jingleh ka MBOSE kam iahap satia. Katba ka NEHU ka la ithuh bad ka la trei ban kyntiew ia ka ktien Khasi hynrei ka MBOSE pat ka la thmu ban pynduh pynban. “Kumno ia ka Arts sobjek kin pynlong elective sobjek ha ka Science bad Commerce”, la ong u Dr Nonglait.
U la ong ba ha kiwei ki jylla, kim ju pynduh ia ka MIL hynrei ki ailad da ka Alternative English ia kito ki bym shim MIL kum ha Tamil Nadu.
“Ka jingleh ka MBOSE kan pynduh noh ia ka jinglong kyrpang ka ktien Khasi”, la ong u Dr Nonglait.
Khlem artatien ka jingpynduh ia ka Khasi MIL, kan pyntlot ia ki samla ban pule Khasi bad haba ym don shuh ka Khasi MIL kin duh noh ban pule Khasi.
Katkum ka jingong u Dr Nonglait kane ka jingleh ka MBOSE ka lah ruh ban ktah wat ia ka jingiakhih ban dawa pynrung ia ka ktien Khasi ha ka khyrnit ba phra ka riti synshar ka ri ne ka 8th Scheduled ka riti synshar ka ri.
“Kane ka jingleh ka MBOSE ka dei kaba shu leh kyrkieh khlem da pyrkhat janai”, u la ong.
U la iathuh ba ka KAS ka la pynlong ia ka jingialang dang shen hadien ba la ioh ia ka jingpynbna na ka MBOSE bad ka la phah ia ki katto katne ngut ki dkhot ban leit iatwad jingmut bad ki nonghikai skul halor kane shwa ba ka seng kan shim pat ia kawei ka rai.