Ka MBOSE, ka dei ban aiti beit, ha ki skul ia ka Eksamin klas IX

Shillong, 27 Naiwieng:
Hadien ba ki ki jingkylli jong ki khynnah klas IX ki la lait tuh khyndiat sngi shuwa ban long ka eksamin,ki nongialam ka Khasi Jaintia Deficit School Teacher’s Association mynta ka sngi ki la leit ban ia kynduh ia u Executive chairman ka MBOSE u bah E.P Kharbhih ban ia kren bad u halor katei ka phang.
Ha katei ka jing iakynduh ki nonghikai ki la dawa na ki bor ka MBOSE ba ka dei ban pynbeit ha ka rukom kaba dei lada ka kwah ban pyniaid dalade hi ia ka eksamin khynnah klas IX, hynrei lada kam lah ban pynthikna ba ka lah ban pyniaid beit iaid ryntih ka la bha ia ka ban aiti hi noh ha ki skul ba kin leh ia kaba donkam.
Ki nonghikai ki la ai jingmut ruh ia ki bor ka MBOSE ba lada ki kwah ban pyniaid ia ka eksamin dalade hi, kan jin da la bha ia ka ban pyniaid ia ka eksamin kumba leh ha ka Matrik ym kumba ka leh mynta. Ki la ong ba kan bha ia ka MBOSE lada ka leit ban buh lypa ia ki jingkylli jong ki khynnah ha thanad pulit bad baroh ki khynnah klas IX ki dei ban ia khun ia ka eksamin jong ki ha ki jaka ba la jied ne ki Deposit Centre ym shuh ha ki skul jong ki, namarba ki don ruh ki khynnah klas IX sha ki jaka ba kyndong kaba ym lah ban pynpoi kali hapoh ka 2 kynta kumba la buh por ka Board ban lum ia ki jingkylli.
Katkum ka jingkren kitei ki nonghikai kiba la ialam da u Chairman jong ki u bah E.D Nongsiang ki la ong ba kumba long ha kane ka dur kaba la jia khlem pud la lai snem tam mynta , ki nonghikai ruh kim lah shuh ban shaniah ia kane ka rukom pynialeh eksamin ia ki khynnah klas IX da ka Board Ki la dawa ruh na ki bor jong ka Board ba ki dei ban pynshitom ia kiba donkti ha katei ka kam ban die tuh lane ban pyllait tuh ia ki jingkylli ki khynnah skul namarba ka jingleh jong kiwei ar ngut ka la pynjynjar sat ia kiba bun balang naduh ki khynnah skul, ki kmie ki kpa bad ki nonghikai ruh.