Nongpoh: Ka Mawtneng Sports Club, ka la ioh ban rah ia ka namlahduh ha ka lympung ialehkai phutbol, kaba tip kum ka 1st Eastern Ri Bhoi Football Tournament, kaba la pyniaid da ka Eastern Ri Bhoi Sports Association (ERBSA), hadien ba ka la lah ban pynliem noh da 3-0 pyrshah ia ka Umket Sports Club, ha ka jingiakhun phainal kaba la long ha madan Sohraman, Bhoirymbong.
Ha kaba kut jong katei ka lympung ialehkai, u Bah George B Lyngdoh, MLA ka Umroi Konstituensi, u la long kum u kongsan ha ryngkat ka jingdon u Samla Eugeneson Lyngdoh, u Rangialehkai ba paw ka jylla kum u special Guest, u Bah Charles Marngar, MDC ka Mawhati Konstituensi, u Bah Joplin Sten, President ERBSA lem bad kiwei ki riew rangbah jong katei ka thain.
Haba phai sha katei ka jingiakhun phainal, ka kylla step jong ka jingiakhun, ka la long shisha kaba itynnad bad kaba iakhaid bormet bha, namar ki rangialehkai jong kitei ki ar-kynhun, ki la sei shisha ia kata ka sap ialehkai kaba itynnad bad kaba la pynhun ia ki khmat jong ki paidbah, kiba la sakhi ia katei ka phainal, kumta haduh ba kut jong ka kylla step, ki la pynkut ia ka jingiakhun da ka jingiakhaid kaba 0-0.
Haba bteng ka kylla miet, ka jingiakhun kaba la nang kham shongshit shuh shuh da ka jingtreishitom ki rangialehkai na baroh ar kynhun, kumta katba ka por ka la nangiaid shakhmat u Willyboy Kharlukhi, u la lah ban lamkhmat ia ka jingiakhun da kaba pynkhih jar ha ka minit kaba 63 bad 69 minit, hynrei kaba la pynthikna syndon ia ka Mawtneng SC ban rah ia ka nam lahduh, ka dei ka kol kaba lai kaba la thep da u Mebanker Shylla ha ka minit kaba 71 bad kaba la pynlong syndon ia ka Mawtneng SC ba kan pynliem noh ia ka Umket SC da kitei ki lai kol bad rah syndon ia ka nam lahduh ha katei ka lympung ialehkai.
Ka Mawtneng SC, kaba la ioh ban rah ia ka nam lahduh, ka la ioh ban khung syndon ia ka song pisa kaba T. 50 hajar tyngka lem bad ka trophy, katba ka Umket SC kaba la shah rem noh ha katei ka phainal, ka la ioh ia ka song pisa kaba T. 25 hajar, ha kajuh ruh ka por la sam ruh ia ka khusnam ia ka kynhun kaba la wan ha ka kyrdan balai, ia kaba la khur da ka Thadrang SC bad kaba la ioh ia ka song pisa kaba T. 15 hajar tyngka bad ka Mawthei SC kaba la wan ha ka kyrdan ba saw ka la ioh T. 10 hajar tyngka.
Nalor ka khusnam sha ki kynhun, la sam ruh ia ki khusnam shimet, ha kaba ia ka nam Top Scorer la ioh da u Sharp Nongbri, Best Goalie da u Wanlambok Shadap bad u Willyboy Kharlukhi, u la ioh ia ka nam Man of the Match.
Phi don ban ong eiei?