Ka Mawlai Secretariat ka dang treikam,ong U Bah Founder Na ka 30ngut, don sa tang 4ngut ki nongtrei

Shillong, 12 Nohprah:
U MLA barim ka Mawlai u Bah Founder Strong Cajee u la ong ba ka Mawlai Secretariat ne ka Greater Mawlai Coordination Committee for development ka dang plie bad na ka liang jong u bad ki nongpeit kim pat shim kano kano ka rai la yn khang ne yn bteng. Haba iakren mynta ka sngi bad u Rupang, u Bah Founder u la ong ba ia haduh mynta um pat lah bad rai la kin khang noh ia ka Mawlai Secretariat ne ban dang pynsah. U la ong ba halor kane ka Secretariat kin sa rai da kaba shong jing ialang ha shwa ka MDC elekshon. Ia kane ka Secretariat la plie da u Bah Founder ha ka por ba u dang long MLA, ha kane ka Secretariat ki ju pynlong ki jingia lang bad ki dorbar shnong, ki sengbhalang bad kiwei kiwei ki kam paidbah. “Ia mynta ngim pat lah ban ong ei ei la yn khang ne em ia ka Secretariat”, la ong u Bah Founder bad bynrap, ngin sa iashong ban iapyrkhat halor kane bad yn un sa khot ia ka jingialang shwa ka elekshon MDC.
Ha kane ka Mawlai Secretariat, u Bah Founder u ju pynlong ia ka jingialang ban iapyrkhat ia ki kam pynroi ka Mawlai bad kum ka jaka treikam ban iakynduh ban iakren kam paidbah.
U Bah Founder u la thaw ia kane ka Secretariat ha kaba ma u, un long kum u Myntri Rangbah bad ki nongialam shnong ki rangbah shnong kin long ki nongia aijingmut ban iakren ia ki kam jong ka Mawlai.
Katkum ka jingong u Bah Founder, u la buh ia ki nongtrei kumba 30 ngut eiei ha kane ka Secretariat, hynrei mynta namar ba u la rem elekshon, ki kham duna sha ka 4 ngut eiei bad ia ki nongtrei la siew tulop na la pla jongu hi.