Ka Mawïong ruh, ka hap ha ka Map ka Garo Land

Shillong, 18 Jymmang:
Ka Umiam, ka Riangdo, Shahlang, Nongjri, Nonghyllam, Borsora bad kiwei pat ki shnong ki la paw kyrteng ha ka map ba la tyrwa ban thaw ia ka Garo Land lane ka Proposed Garo Land Map. Ym shym la tip ia ka tyllong naei ba katei ka Map ka mih, hynrei katkum katei ka Map kaba u nongthohkhubor u ioh la pyni ia ka Map jong baroh kawei ka Meghalaya bad ia ki jaka ba la tyrwa ban pynhap ha ka Garoland la pruid da ki dak iong bad katkum kitei ki dak iong kiba la pyni ban pynhap ha Garo Land ka jingheh jong ka jaka ka long palat mar shiteng jong ka Meghalaya.
Kiba bun na ki jaka kiba la pynngat hapoh ka Garo Land katkum ka map tyrwa ki dei ha South West Khasi Hills bad West Khasi Hills bad tang shi lynnong la pyni dak iong ia ki jaka kiba don ha syndah ka Shillong bad katei ka dei ka Umiam bad ki thaiñ jong ka Mawiong baroh kawei. Katto katne tylli ki shnong kiba ha SWKH bad WKH kiba la pynngat hapoh ka Garo Land nalor kitei ki shnong ba la kdew haneng ki kynthup ia ka Dangar, ka Umlyngkut, ka Riangmaw, ka Nongbrot, ka Nongmaweit, ka Nongkhnum , ka Aradonga, ka Byrnihat bad kiwei pat ki shnong kiba ym shym la ithuh bha ha ka Map namarba la pruid da ki dak iong. Bun ki jingiakren ki la mih halor ka jinglait paidbah katei ka Map Garo Land, ki lad khubor ki la iathuh ba katei ka dei ka Map ba ka seng ANVC kaba la ia soi ia suk bad ka sorkar ka la tyrwa sha ka sorkar pdeng ha ka jingiateh ia soi ia suk.