KA MARIANG KA KMIE KA JINGIM

DA U SAMLA JEREMIIA DKHAR
PRESIDENT, HYC, MAWEIT CIRCLE

Ki dieng ki siej ki syntiew ki skud ki pynitynnad bad pynsiengiwbih ia ka pyrthei. Ki lum ki wah ki krem ki kroh ki kshiad ba noh rymphum ki dei kiwei ki jingthaw baitynnad bad badon jingim jong ka Mei-mariang.
Ki doh-um doh-wah ki mrad ki mreng ha ryngkew bad hapoh um,Ki marpoh khyndew ki diengsoh diengpai ki jingthung jingtep ki kymbat,ki dei ki dkhot met baitynnad jong ka Mei-ramew.

Ka Mei-ramew ne ka Mei-mariang ka dei ka kmie kaba ioh kaba kot kaba lah kaba ia bad kaba sbun ka dohnud ka bym ju khonnioh ban ai eiei katba pan ne kwah ki khun bynriew ha ka pyrthei.

Ka Mei-mariang ka dei ka kmie-rad jong baroh ki briew ha sla pyrthei. Kane ka mei-rad kam ju khapnap ban bsa ban btiah ia ki briew ha shi-snieh ka pyrthei um ju niew shilliang khmat ne peit matdong iano re iano hynrei ka ai ka kyrkhu kyrdoh da ka lyer kaba khuid kaba suba ia ngi ki briew ha ka pyrthei.

Ka Mei-mariang ka don lut hapoh ka met baitynnad bad babha briew jong ka, kam donkam ban pan kylliang na kiwei, ia ki jingdonkam na ka bynta la ki khun la jong ka kaba dei ki paid bynriew ha satlak ka pyrthei.

Ka Mei-mariang ka dei ka kmie kaba don ia ki marpoh khyndew kaba kordor tam ban pynriewspah bad ban pynsuk pyniohja ia ki khun bynriew ha ka pyrthei kum ki Mawlynnai, Mawkordor, Mawshun, Mawlieñ, Mawshynrut,Mawsillimanate,Mawgranite,Dewiong,Maw,shyiap bad kiwei.
Ka Mei-mariang ka don ruh ia ki dew-sboh ha kaba ki briew ki lah ban im bad ioh kamai jakpoh da kaba thung jingthung ne rep jingrep ia ki soh ki pait kum ki sohniamtra, sohpieng, sohmainir, sohphan, sohpriam, sohiong, sohbalensha,sohplom,sohphi,kait,kwai,tympew,bad kiwei la ki jaka jaka.
Ka Mei-mariang ka kyrkhu kyrdoh ruh ia ki khun bynriew ban ioh ka jaka ha kaba ki lah ban rep ban riang ban thung kba thung jhur ha ki lyngkha risa. Ki dieng balaipher jait ki siej ki sken ba laipher jait ki phlang ki kynbat ban ioh ban shna ïing shna dawai bad kiwei,ban im suk im saiñ ha ryngkat ka met bakoit bakhiah ban kamai kajih khlem jingjynjar ne khlem jingpyrwa ha la ki jaka jaka.

Suki pa suki ki bynriew ha sla pyrthei kiba im suk im saiñ ha ryngkat ki jingkyrkhu kiba bun lyngba ka Mei-mariang, ki la sdang ban lehbeiñ lehkhoh bad im ka jingim lyngkar ka bym suidniew bad bym kynmaw shuh ia la ka kmie ba la pyntian lut katba kiba kwah da ka Mei-mariang. Ki la sdang ban pom pathar ia ki dieng ki siej, ki la tih katba lap ba shem ia ki marpoh khyndew khlem jingpyrwa ne pyrkhat shuh ia ki longdien ki ban sa mih pli ha ka lawei.

Lada ngi phai dien sha ki 100 snem mynshuwa ka jingdon jong ki dieng ha sla pyrthei ka long kaba da sngewhun shisha ban peit ne iohi ym donkam ban leit jngai sha ri jong ka pyrthei hynrei tang ha Ri-hynniewtrep ne ri-khasi jong ngi ka la biang ban iohi ia ki jingitynnad jingiphuh iphieng ki lum ki wah ki kshaid ba kdup bad sem da ka Mei-mariang bajyrngam hynrei katba nang mih ki sngi ki jingdon jong ki dieng ki siej ki syntiew ki skud ki la nang duna duna namar ka jingkwah rhah spah jong ngi ki briew.
Uwei u dieng u baheh duh u lah ban pynmih ka lyer khuid ne oxygen tang na ka bynta ki 18 ngut ki briew. Lada ki dei ki dieng rit ka jingpynmih lyer khuid ka duna haduh kata kata bad ka donkm ia ngi baroh ban nym pom pathar pynban ban thung 10 tynrai ki dieng lada ngi pom uwei ban pyndonkam ne lada ngi jaituh ban thung dieng, ngi shu sumar ia ki dieng ki siej kiba la don lypa ha pneh ka Mei-mariang bad ban nym pom klumar ne pom pathar ia ki dieng ki siej katba shaba lap ba shem khlem da pyndonkam.
Khatduh iawai nga kwah ban pynkynmaw iaphi baroh ba ka theme jong mynta u snem ka dei”Trees for the Earth” ne “Ki dieng na ka bynta ka pyrthei” nga kwah ban kyntu ia ngi lang iwei pa iwei ban ri sumar bad kunai ia ki dieng ki siej, ia ki syntiew ki skud, bad ki marpoh khyndew na ka bynta ka lawei ki pateng ki ban sa wan kumba ngi tip ba lyngba ki dieng ki siej ki lyer batimon bad ki lyer khuid ngi sa lah ban im ban ring mynsiem ban iaid ban ieng ban ioh ka met kaba koit kaba khiah hangne ha ka pyrthei.