Ka mang tyngka ka NEC, ka neh kumjuh la 44 snem mynta

Shillong, 31 Risaw:
U Secretary ka North Eastern Council (NEC) u Ram Muivah u la ud ba ka jingmang pisa ka sorkar pdeng ia ka NEC kaba peit ia baroh ki jylla ka thain mihngi ka long kaba rit palat bad namar kata, bun ki kam ba heh, la shem jingeh ban bei pisa.
“Ka mang pisa ka sorkar pdeng ia ka NEC ka la long kumjuh haduh mynta la 44 snem. Ka jingmang pisa ka long tang 700 spah klur ha ka shi snem bad mynta ka la kiew sha ka 800 klur”, la ong u Muivah.
Na kane ka pisa, T. 50 klur la ai ia ka Airport Authority of India, T. 47 klur ia ka jingiarap ban pyniaid helicopter, T. 70 klur la ai ia ka NERCOMP kaba leh ia ki kam ban kyntiew ia ka ioh ka kot jong ki briew ka thain, T. 3 klur la ai ia ka Border Road Organisation, bad kaba sah la mang ia kiwei ki projek.
Ka pisa kaba mang ia ki kam ba thymmai ka long tang kumba 20-30percent eiei hynrei bun na ka jingmang tyngka ba la hap ban bei ia ki projek rim.
U la ong ba ka jingduna palat ka jingmang pisa ka la buh jingeh ia ka NEC ba kan bei pisa ban pyntrei ia ki kam ha kane ka thain jong ki 8 tylli ki jylla.
Baroh ka pisa ka sorkar pdeng ka la ju mang, la pynlut beit plain man u snem hynrei dei tang ha ka por ba long myntri DoNER u VK Singh ba ka sahkut haduh T. 200 klur, la ong u Secretary ka NEC.
U la ong ba haduh mynta, ka NEC ka la shna 10500 km ki surok ha kane ka thain, 2540.41 km la shna ia ki line pyniaid ding, 694.5 MW la shna ia ki jaka ne steshon bording ha kane ka thain.