Shillong:Ka FKJGP Aradonga Area Unit ka dap da ka jingkmen ba ka Sorkar lyngba ka tnad jong ka Health Department, ka la wanrah ia ka Machine ban scan ia ka jingpang Covid-19 ne Corona Virus ia kiba rung ba mih na Assam sha Meghalaya lyngba ka Athiabari sha West Khasi Hills kaba dei ka exit and entry point ban rung ban mih sha West Khasi Hills baroh kawei; hynrei kaei kaba sngewsih ka long ba naduh bala wanrah ia katei ka Machine hangtei haduh mynta, ka seng haba ka la tohkit halor katei ka machine ka jubab ka long ba “ym don ba nang ban test” ia katei ka machine.
Ka Sorkar kala buh ia u Magistrate ban peit ia katei ka jaka, hynrei kaba sngewsih ba ia u Magistrate la shu hikai tang shi sngi kumta ki khlem lah ban pyn treikam satia ia katei ka machine. Kumba long mynta ka Health Department ka buh mynta tang kawei lane arngut ki para Medical Staff hangtei ha Athiabari Check Point, kaba duna palat bad ka donkam ban pynkhlain ia ka para Medical Staff ban trei ha katei ka jaka.
Ka seng ka ai ia ka jingiaroh ia ki Pulit ba trei shitom ban pahara ia katei ka jaka kaba ha khappud bad ka Assam hynrei ha ka jingiohi jong ka seng ba ka lynti kaba iaid lyngba ka Rangsapara ban leit sha Boko bad Hahim la donkam ban don noh ka Check Point (Police) namar la iohi ba kiba rung ba mih laitluid ban leit sha Assam kaba buh jingma ia ka thain khappud khamtam ia ka West Khasi Hills baroh kawei khamtam mynta ki la don kiba ioh pang ha ki thain Boko-Assam.
Kumta ka seng ka dawa halor kitei ki lai tylli ki mat ba ka Sorkar kam shimkhia bad leh noh kham kloi, ong ka kyrwoh na U Trelling D.Shira, President FKJGP Aradonga Area Unit.
Phi don ban ong eiei?