Ka lynti jong ka VPP, dei ka jing pyniashun jaitbynriew, ong u bah Paul

Shillong:Ki Garo ki kham stad kham iohi jngai lada ianujor bad ki Khasi”, la ong u myntri sorkar jylla u bah Paul Lyngdoh.

Haba kren mynta ka sngi sha ki lad pathai khubor, u bah Paul u la ong ba ki Garo ki la pyni ia ka jingstad bad ka jingshemphang haba jied ia ki nongmih khmat, katba ki Khasi kila shu kiw kiw kaw kaw.
“Hangne ha Khasi Hills, la pynmih sur ba kwah da u Myntri Rangbah Khasi ha shwa ka elekshon 2023, hynrei kum kane ka sur kam mih satia ha Garo Hills hynrei ki leh da ka kam. Ki la khanglad ia ka jingangnud ki Khasi da kaba pynjop syndon 18 na ka 24 ngut sha ka NPP marwei ha Garo Hills”, la ong u bah Paul.

Ha kajuh ka por, u la ther ka Voice of the People Party (VPP) kaba la pynlong isih jaitbynriew lyngba ka Reservation Policy. U la ong ba ka lynti ba jied ka VPP ban pynkhih win ia ka Reservation Policy, kam dei shuh tang ka jingleh politik hynrei ka jingiashun para jaitbynriew.
“Nga la pynsngew ia ka sur halor ka Reservation Policy naduh 20 snem mynshwa, haei kita kiba pyrta mynta?”, la buh jingkylli u bah Paul uba dei u Working President ka UDP, uba pynkhih ia kane ka mat ha ka por ba u dang long kum u President ka KSU ha kito ki por.

Ka video kaba u la kren ha u 2002, ka la saphriang bha ha ki rynsan social media.
“Ka video ka dei ka sakhi ba u Bah Paul Lyngdoh u la rah ia kane ka mat Reservation la 20 snem mynshwa, mynta ngan kylli, haei ki video ba u bah Ardent u pynsawa halor ka Reservation policy ha ki 20 snem mynshwa. U dei u nongialam jong ka seng (FKJGP) ha kito ki por, hynrei um ju wan ban kyrshan ia ka KSU ha ka jingdawa jongka”, la ong u bah Paul.

U la ther ia u bah Ardent, ba u la jah haba mih ka jingdawa ban pynbeit ia ka Reservation Policy ha ki 20 snem ba la leit namar ba u dei u nongialam ka Federation of Khasi Jaiñtia and Garo People (FKJGP). U la ong ba imat dei na kane ba u bah Ardent um ju kren ia kane ka mat mynshwa.
Haba tih pyrshah ia u bah Ardent M Basaiawmoit, u bah Paul u la buh jingkylli, “U bah Ardent uba dei u MLA ha ka por ba long Myntri Rangbah u Dr. Mukul Sangma uba synshar 8 snem, um ju kren eiei ia ka Reservation Policy. Balei kane ka mat kam mih ha ka por ba long Myntri Rangbah u Dr. Mukul Sangma, balei mynta pat?, la buh jingkylli u bah Paul.

U la ther ruh ba dei u bah Ardent uba risain nyngkong ia ka kam MDC tang shu wanrah u Dr. Mukul Sangma ia ka ain bam ar maloi ha kito ki snem.
“Mano ba risain nyngkong ia ka kam MDC tang hapoh shi kynta ba la wanrah ia ka Bill bam ar maloi da u Dr. Mukul Sangma”, la ong u bah Paul.
U la bynrap, “Tang ka dorbar ruh ym pat kut, hynrei ka shithi risain ka la dep poi sha miej u Dr. Mukul Sangma”.

Lah ban kdew ba ha ka 24 tarik Nailur 2015, u bah Ardent uba dang long kum u vice president ka HSPDP u la risain ia ka kam MDC ha u chairman ka KHADC, u bah Manstudy Nongrem hadien ba ka ïing dorbar ka la mynjur ia ka kam bam ar maloi ne ka Prevention of Disqualification (Members of the Legislative Assembly of Meghalaya) Amendment Bill, 2015 ha ka dorbar tlang, hynrei kane ka ain ka la shah khylliap noh ha ka Kashari hadien ba u bah Pynshngain N Syiem u la iakhun pyrshah.
“Ka High Court ka la pynbna ba ka kam MDC kam dei ka kam ioh nong bad u bah P.N Syiem u la jop”, la ong u bah Paul.

U la ong, “Phi kren ia ka trading license, nga la pyndep ia ka kamram bad phi la iohi. Ki myntri sorkar ha kato ka por ki la wan khnang sha District Council namar ba ka ktah ia ki vote jong ki, hynrei nga ong em, lada ngi trei ia ka kam khlem kano kano ka jingtieng ne ka jingshah liang bad haba nga bat ia ka tnad Trading ha KHADC, ka la wan ka shithi na u Myntri Rangbahduh ka ri”.
U la ong ba ia kane ka shithi la phah sha NEC kaba la phah pat sha ka sorkar jylla bad ka sorkar jylla ka la phah sha ka KHADC ban pan jubab, hynrei hadien ba la pynkylla ia ka jingbate kam, u khlem ioh bat shuh ia ka tnad Trade.