Ka lyngkor kaba khia jong ka jaidbynriew phin hap kit haba phi long u dkhot ka KSU: L. Marngar

Nongpoh: Hynnin ka sngi u Samla Lambokstarwell Marngar, President ba rangbah ka Khasi Student Union, Sengkmie, u la hiar sha ki thain Mawhati ha Ri Bhoi, na ka bynta ban leit pynskhem ia ki nongkitkam ka KSU ha lai tylli ki unit kiba don ha ki shnong bapher bapher ka thain Mawhati.

Kitei ki Unit kiba hap hapoh ka jingpeit ka Umsning Circle bad kitei ki Unit ka KSU kaba la leit ban pynskhem da u President ba rangbah ka KSU, ki kynthup ia ka Shilliang Umdoh Unit, ka Mawrathud Unit bad ka Laiphewdiengngan Unit, ha kaba ia kitei ki dkhot ba thymmai ka KSU la pyntiansmai da u Nongialam ba Rangbah ka seng KSU Samla Lambokstarwell Marngar, ha ryngkat ka jingdonlang u Samla Biangbor Paliar, Vice-President, Eric Nongkynrih Asst General Secretary, u Samla Ferdynald K Kharkamni, President KSU NKHD Unit,Lambok Rymbai General Secy NKHD unit lem bad kiwei ki nongkitkam ka KSU.

Haba pyntiansmai ia kitei ki dkhot ka KSU, u President rangbah ka KSU, u la sneng bad kyntu ia ki dkhot jong kine ki unit da kaba u ong ba kum ki Samla ki dei ban shim ka jingkitkhlieh ban iada, ban khih ban ksar bad khanglad ia kum ki ta ki jingthombor ki bor ba nabar khnang kata ka snap ba kyrpang ka jaidbynriew khasi kan neh shyrta ha kane ka sla pyrthei. U la ong ruh ba ka jingma ba shyrkhei ka ap ia ka jaidbynriew barit paid jong ngi namar bunsien ki jaidbynriew ba hehpaid ki pyrshang kumno ban khniot bein lane ki thaw ki lad ki lynti ban pyntroin ia ka jaidbynriew.

Kum ki dkhot ka jaidbynriew ngi dei ban kynmaw dngong ban buh ha khmat ia ki mat ki jura ban iada kyntiew bad ban shakri ia ka Jaidbynriew met bad mynsiem lyngba ka KSU ym ban pynlong tamasa haba phi long ki dkhot ka KSU. Utei u President ba Rangbah ka KSU, u la pynkynmaw sha kitei ki dkhot ka seng, da kaba ong, haba kyrtiang dien ha kine ki 42 tylli ki snem ba ka KSU ka la longdoh longsnam ka la iaid ia ka lynti ba khohruh khohram lyngba ka jingjawsnam bad shah pyntynjuh ki dkhot jong ka jaidbynriew hynrei ka mynsiem ba shynrang lyngba jong ki ba ka dang iengskhem haduh mynta mynne khlem kynran dien ia ki jingeh namar ba ka nongrim ka seng ka skhem. U la banjur ruh ba ka Madan thma ka la ap lypa hynrei ki dei ban tbeh sha pyrshah ka thong ban jop bad ngi tip ba ngin ym liem ne khyllem lada ki samla ki neh ka nongrim kumba phi shim ia ki ktien smai haba phi long ki dkhot ba pura ka seng KSU. U sngewbha ruh ban ai khublei kyrpang ruh sha baroh ki kmie ki kpa jong ki samla ka jaidbynriew ki ba la len lade ha kiba ka bun ki jingtyrha ba dei lyngba ka jingkyrshan ki Kmie ki Kpa bad teng teng ki mat wat ia ka jingjaw ummat hynrei na bynta ka dawbah ka jaidbynriew ki iai ai mynsiem bad kyrshan ia ka KSU haduh mynta mynne.

Ki Nongkitkam ka Shilliang Umdoh Unit, ki kynthup ia u Star Mynsong, kum u President, u Elvis Muktieh kum u Vice-President, u Spering Nongrum-General Secretary. Ki Nongkitkam ka Mawrathud Unit ki kynthup ia u Peter Wanphang, kum u President, u Toris Shadap-Vice President bad u Redington Shadap kum u General secretary. Katba ki Nongkitkam ka Laiphewdiengngan Unit, ki kynthup ia u Lanshing Muktieh kum u President, u Rimio Kyrsian, Vice-President bad u Blestar Kyrsian kum u General Secretary. Ha man kitei ki Unit thymmai ki don pat sa shibun ngut kiba long kum ki dkhot ka KSU.