Nongpoh: Ka Sonidan Sports Club lem bad ka Lumniwar Sports Club, ki la long kum ki kynhun kiba la poi sha ka thup jong ka Phainal ha ka Ri Bhoi League Championship 2019, ka lympung ialehkai football kaba la pyniaid da ka Ri Bhoi District Sport Association (RBDSA).
Lah ruh ban kdew hangne ba kitei ki ar kynhun kiba la poi sha katei ka thup jong ka Phainal, ki dei kiba la mih na ka Mawhati Zone bad kiba la pynliem lut ia baroh ki kynhun ialehkai, kiba la mih na Umsning Zone, Bhoirymbong bad Nongpoh Zone.
Ia katei ka phainal, kaba na RBDSA ka la pynbeit ba kan pynlong ha ka 11 tarik mynta u bnai ha ka madan ialehkai ka shnong Umdihar, ha kaba ka kynhun ialehkai jong ka Sonidan SC kan iakhun pyrshah ia ka Lumniwar SC, na ka bynta ban pynthikna ialade kum kita ki kynhun kiba khlain tam ha Ri Bhoi.
Na ka liang ki bor pyniaid ka RBDSA, ka la nang pynkhreh shaid shaid ban pynlong ia katei ka jingiakhun ia ka phainal kaba shongkun bad kaban sah jingkynmaw hadien ba la lah ban pynkhie im biang ia kane ka lympung ialehkai football kaba heh jong ka district hadien ba ka la jah noh shipor.
Haba ia kren bad ki lad pathai khubor, u Bah G.S Shadap kum u Senior Vice President ka RBDSA, u la pynpaw ia ka jingkmen ba sa shisien pat kane ka lympung ialehkai jong ka Ri Bhoi League la lah ban pynlong ia ka hadien ba ka la jah shipor hynrei ha kane ka kynti da ka jingiatreishitom lang jong baroh ki nongkitkam ka synjuk la lah ban pynlong ia kane ka lympung ialehkai football kaba jop bad kaba shongkun.
U la pyntip ruh, ba ka RBDSA ka la pynkhreh bha ban pynlong ia ka phainal kaba itynnad bad kaba shongkun ia kaba la buh ha ka 11 tarik mynta u bnai ha madan Umdihar, ha kab u Bah Banteidor Lyngdoh, Myntri ka tnat ialehkai sport ka jylla un wan ban long kum u kongsan ha ka jingiadonlang ruh kiwei kiwei ki riew pawkhmat kynthup naduh ki MLA, ki MDC ka Ri Bhoi District, ki heh ophisar bad ki rangialehkai ba pawkhmat ka jylla kin wan ban sakhi ia ka jingpynhap pyrda ia kane ka Ri Bhoi League 2019.
Namarkata, na ka liang ka RBDSA ka kyntu ia ki paidbah ha Ri Bhoi, ba kin wan ban sakhi ha katei ka sngi, kaba yn pynkut noh ia ka Ri Bhoi League Championship 2019.
Phi don ban ong eiei?