Ka long ka jingduh kaba khraw, na bynta ka seng UDP, ong U bah Metbah

Shillong: “Ka long ka jingduh kaba khraw na ka bynta ka party UDP ngim pat lah ban ngeit ia kaei kaba ngi laduh ia u nongialam rangbah jong ka party jong ngi,bad ym dei tang ha party hynrei ia ka jylla baroh kawei bad yn ym don u wei ruh u ban lah ban trei kum batrei ma i” la ong u Metbah Lyngdoh u cabinet minister jong ka UDP haba ia kren bad ki nongpathai khubor.

Na ka liang ka seng UDP ka la phah ia ka jing sngew lem ia ka ing ka sem jong u Dr Donkupar Roy da ka ba ong “Ka long ka jingduh kaba khaw ba ngin duh ia u nongialam u ba khraw jong ka party u Dr Donkupar Roy. Ngi la shim ia ka rai ba ngin phah ia ka khubor jingsngewlem bad don ryngkat bad ka ing ka sem ha kine ki lai sngi lashai ka sngi ruh ngin leit buh ia ka met na shillong sha Sohra ha ka ing jong ka constituency jong i bad kumjuh ruh sha Shella ban pyndep ia ka jingai khublei ba khadduh bad ka jingsngewnguh ka ba khraw ia u nongialam kaba khadduh ia u”.
Ha kawei pat ka khubor, ka Regional Democratic Aliance ha ka jingialang ka ba long ha MLA Hostel, ki MLA kiba don hapoh ka shatri jong RDA (ka UDP bad ka HSPDP) ki la rai ban bynshet ia ka kam shongknor ha u Renikton Lyngdoh Tongkhar, u ba long u MLA ka Mawkyrwat Constituency.
Na ka liang u bah Renikton Lyngdoh Tongkhar u la ong “Ka long ka jingduh kaba khraw ban duh ia u nongialam jong ngi, hynrei ngim dei ban duh jingkyrmen hynrei ngi dei ban bud ia ki dien kjat bad ki nuksa ka ba u Dr Donkupar u la ialam lynti ia ngi.”
“Kum u nongialam ka jingang nud bad ka jingkwah jong u Dr Donkupar Roy ka long ka jingiatylli jong ki seng riewlum bad ka jingmih ka RDA ka long ban pyn iatylli ia ki seng riewlum,”la ong u Bah Renikton.
Na ka liang ka RDA ngi ai ia ka jingsngewlem ia ka ing ka sem baroh kawei bad ka long kaba sngewsih ba ngi la duh ia u nongialam u bakhraw.
Ha kawei pat ka khubor, la iathuh ba ka Meghalaya Democratic Alliance (MDA), ha ka jingialam U Conrad Sangma, myntri rangbah ka Jylla, ka la ia kynduh mynta ka sngi ban pynlong ia ka jingialang sngewlem halor ka jingkhlad noh U Dr Donkupar Roy. Hadien ka jingialang, ki nongialam ka MDA, ki la leit sha ka iing sah jong utei u nongialam, ha kaba ki la leh burom, da kaba buh syntiew ha ka synduk jongu.