Shillong:Ha ki khyndiat sngi ba ladep, u kni jong u heprit, uba khlad ha Karnataka, u bah Wanjan Khongtani, ula kyntait ba ka jingleit skul, jong u pyrsa jongu, U Khrehlang Khongtani, ka dei kaba la ialam da ka seng RSS, hynrei u kam, ba la ialam ia utei u heprit da ka Seng Lei Synshar Cultural Society.
Ka jingphah skul khun sha ki jylla kiba shabar, ka la iai bteng, naduh ki phew snem ba ladep bad kane ka mat, ka la paw pynryngkew ruh ha ki snem 2013-14, ha kaba ha U Nohprah 2013, ka la mih ka khubor, halor ka jingleit ialam jong ka Lei Synshar Cultural Society, ia 20ngut ki hep rit, ha kaba ki la leit pule ha ka jaka ba la pyniaid da ka Sri Nivedita Seva Trust Hosur, Tamil nadu bad la pynsah ia kitei ki heprit ha kawei ka hostel kaba la tip kum ka Sri Anusuya Devi Free Hostel kaba don ha Hosur. Baroh kitei ki heprit ki dei ki khynnah kynthei.
Ha katei ka por, ka Deborah C Marak, myntri ka tnat Social Welfare, ha ka 17tarik Nohprah 2013, ka iathuh ba ka jingphah ka Lei synshar ia kitei ki 20 ngut ki heprit ka long pyrshah ia ki kyndon ain jong ka Child Welfare Committee (CWC), ha ka jylla, namar ba baroh 20 ngut kitei ki khynnah kynthei ki dei kiba dang hapoh ka rta kaba 12 snem bad ruh ka Lei Synshar Cultural Society kam shym la pan jingbit eiei na ka CWC, shuwa ban phah ia kitei ki khynnah. “Katkum ki kyndon ain jong ka CWC shuwa ban phah ia ki khynnah shabar jylla dei ban ioh jingbit shuwa na ka Commission” ong ka Myntri ka tnad Social Welfare ha katei ka por, haba iakren bad ki nongthohkhubor.
Halor kitei ki jingkynthoh na ka liang ka myntri, ha ka sngi kaba bud, ka 18tarik Nohprah 2013, ka Lei Synshar Cultural Society ha ka kyrwoh ba la phah da u President jong ka u Bah B.B Khonglam bad u General Secretary u Bah Puramon Kynjing ka la ong ba ki 20 ngut ki heprit kiba don ha katei ka por ha Taminnadu kim dei kiba la phah da ka Lei Synshar hynrei ki dei kiba la phah da ka mon sngewbha ki kmie ki kpa jong ki bad la ong ruh ba ka Lei Synshar ka dei tang ka seng kaba pynbit pynbiang na ka bynta ban ioh rung sha katei ka jaka pule. Ka Leisynshar ka la kyntait ruh halor ka jingmih khubor ba ka la pynkhein ia ki kyndon ain ka CWC bad ka la kam ba ki dei tang ki jingkynnoh kiba bakla.
Shuh shuh katei ka seng ka la ong ba kitei ki 20 ngut ki heprit kiba don ha Tamilnadu kim dei ki khynnah surok ne ki kharkhrong ne ki khynnah kiba khlem ing khlem sem hynrei ki dei ki khynah kiba don la ki jong ki kmie ki kpa ban ri bad sumar ia ki bad ka jingleit jong ki sha Tamilnadu ka dei na ka bynta ka jingpule.
Ka la ong ruh ba kitei ki khynnah kim dei kiba hap hapoh ka ‘child in need of care and Protection’ kumba la batai hapoh ka Juvenile Justice (Care and Protection of Children) Act, 2000. Kumta katei ka seng ka la ong ba ym donkam ia ki kmie ki kpa lane ia ka seng ban ioh jingbit na ka CWC ne ka Social Welfare ha kaba ia dei bad ka jingphah ia kitei ki khynnah.
Nangta ha ka 16tarik Rymphang 2014 ka Madras High Court ka la hukum ia ki bor ba dei peit ia ka tnat ka koit ka khiah ka jylla Madras ba kin pynbiang ia baroh ki jingdonkam ha kaba iadei bad ka jingai jingsumar ia ki ar phew ngut ki khynnah ia kiba la kynnoh ba la leit buh da ka seng Lei Synshar Cultural Society na Megha laya bad ban pynsah hapoh ka ïing ha Narendra Nambikkai Natchathiram kaba don ha Krishnagiri.
Ka ïingbishar ka la pynmih ia kane ka hukum, hadien ba u Session Judge jong ka Madras High Court u la leit ban jngoh ia katei ka ïing, ha kaba ki sah kitei ki khynnah.
U Jugde u la bthah ia u Joint bad Deputy Director jong ka Medical Services bad ia u Superintendent jong ka hospital sorkar ha Krishnagiri, ban ai ka jingsumar kaba biang ia kitei ki khynnah.
U Sessions Judge u la lap ba ki katto katne ki khynnah mynta ki don hapdeng ka jingpang bad shitom kiba sah ha katei ka jaka.
Ki 20 ngut ki khynnah rit kiba don hapdeng ka rta 8 haduh 13 snem kiba na Pynursla bad Jowai ki la shah ialam sha Sri Anusuya Dei Free Hostel ia kaba la pyniaid da ka Sri Nevidita Seva Trust kaba don ha Hosur, Tamil Nadu da ka seng trei mon sngewbha ia kaba la tip kum ka Lei- Synshar Cultural Society kaba la ialam da u Barberar Khonglam kum u President bad u Puramon Kynjing kum u General Secretary Puramon Kynjing na ka bynta ban pynbiang ia ka jingai jinghikai ei.
Kham mynshwa ka Tehelka, kawei na ki lad pathai khubor online, ka la pynmih khubor ha u snem 2001, ba ki don haduh 1,600ngut ki khynnah rit na Meghalaya, kiba la phah ban leit pule sha ki 35 tylli ki skul sha Karnataka bad ha ka 7tarik Jylliew 2009, la phah ia 160ngut ki khynnah, ba kin leit sha Bengaluru bad ka jingmut kaba kongsan, ha kitei ki snem, ka dei na ka bynta ban khanglad ia kitei ki heprit, ba kin kylla Khristan.
Phi don ban ong eiei?