Shillong: Ka jingshah rem ka Shillong Lajong FC ha ka India Arrows da 3-0 ha ka jingialehkai Hero I-League ha ka sngi U Blei ha madan JN Stadium Polo, ka la buh ia kane ka kynhun na Shillong ha ka jingiaid lynti kaba dum.
Haduh mynta ka Lajong ka dei ka kynhun kaba don ha tduh ha ka miej iakamai point kaba long tang 4 point na ki 12 sien ialehkai.
Kane ka jingshah rem ka la pynjew ia ki rangialehkai ka Lajong bad kumjuh ia ki paid nongkyrshan namar ka dei ka jingiakhun ba don eh ban jop ban nangjam shakhmat.
Da kane jop ka Indian Arrows ka la kiew shakhmat ka Gokulam bad Aizawl (kiba la kamai mar 10 point) ka kyrdan baphra da 13 point na ki 12 sien iakhun katba ka Lajong ka neh ha trai duh da 4 point na ki 12 sien iakhun.
Ka jingiakhun kaban sa wan ia ka Lajong kan long pyrshah ia ka Real Kashmir FC ha ka 19 tarik hakapor 5 baje janmiet. Kumba ka paw, kane ka kynhun na Kashmir kaba dang thymmai, ka la lehkai bha ha kane ka kynti bad khlem pep, kumba la paw na ki jngialehkai ba la dep, ka Lajong ka ishem jingeh ban pynliem ia kane ka kynhun. Ka Lajong ka la shah pynbam ha kane ka kynhun haduh 6-1 kol ha ka jingiakhun ba la dep.