Ka lalot sha ka lanot, mad ka thain Myntang

Jowai, 23 Risaw:
Na ka jinglalot mynta pat ki paidbah nongshong shnong bapher bapher jong ka Thain Shilliang Myntang ki la ngat sa ha ka lanot, bad ka tei ka dei namar ka jinglalot spah jubor jong ki namar ba ka jingkhlong bad tih maw jong ki briew na ka shnong Mynso, ha kaba katei ka jingtih maw ka la pynlong pynban kum hka jingpynjulor ia ka surok bah naduh na ka shnong Mynso shaduh ka shnong Samatan.
Ha ka kyrwoh ba la pyllait da ki paidbah nongshong shnong ka thain Shilliang Myntang kiba kynthup ia ka shnong Samatan, Shilliang Myntang, Thadsning, Thangrain, Barato, Mukroh, Maitdein bad kiwei de ki shnong kiba hap hapoh kane ka thain kila pynpaw ka jingsngew diaw haduh katta kata wat, hadien ba ka seng HNYF-JC ka la dep ban pynmih ia ka khubor pyrshah ia kitei ki nongtih maw ba ki dei ban sangeh noh mardor ia kane ka kam kaba pynsyier ia ka leit ka wan jong ki paidbah kaba lah ban wan rah iaki jingma jingmynsaw bad ki jingjia ba sngewsih.
Hynrei na ka liang jong kitei ki nongtih maw ki dang bteng ia kane ka kam haduh mynta kaba la wan rah ia ka jingjot bad jingsniew jong une u surok u ba dei u budlum jong ki nongshong shnong bapher bapher kane ka thain, u ba dei ruh tang une u surok uba kham pynsuk ia ki paidbah ban leit sha sor Jowai bad uba kham pynjan ruh ia ki paidbah ban poi kloi sha kino kino ki jaka ai jingsumar khmatam haka pang ka shitom.
Kumta na ka liang ki paidbah nongshong shnong jong katei ka thain ki kyntu ia ki bor ka tnat PWD ban maramot biang ia une u surok bad kumjuh ruh ia ka Forest Department ban phah khang noh mardor ia kitei ki nongtih maw na ki bynta jong utei u surok. Lym kumta kitei ki nongshong shnong kin shim da kiwei pat ki lad ki lynti ban iada ia une u surok.
Ha kajuh ka por ki nongshong shnong ki kyntu jur ia ka HNYF-JC ban shim khia ia kane ka kam na ka bynta ka imlang sahlang jong kane ka thain, da kaba pynduh pyndam noh ia kitei ki nongtih maw kat kum ka khubor kaba ki la dep pynmih ha une u bnai ba la dep. Pynkut ka kyrwoh na ki paidbah ka thain Shilliang Myntang.