Ka Laitumkhrah, kaba kyrduh um bha ha kine ki sngi

Shillong:Ka shnong Laitumkhrah kaba don hapdeng sor Shillong ka dei kawei na ki shnong kaba kyrduh um bha ha kine ki sngi, nalor ka jingbym biang ka rukom pynkit ia ki niut bad ka jingjyllei u drok.
Ha ka jingia kren bad u Rangbah Shnong ka Dorbar Pyllun ka Laitumkhrah u bah Andrew J Jyrwa, u la kdew ia kiba bun ki jingeh ha Laitum khrah naduh ki jingdonkam jong u paidbah, haduh ka shong suk shong sain bad haduh ka jingktah ha ka imlang.

“Ki jingdonkam ba kyrkieh mynta ka dei ka um bam um dih, ym dei tang ka Mawlai ne kiwei ki shnong ha sor ne khapsor kaba kyrduh um, ka shnong Laitumkhrah ka dei kawei kaba bun bha ki nongshong shnong, nalor kiba la don lypa kiba la rejister hynrei ka jingwan rung wan mih ki briew ruh ki bun bha”, la ong u Rangbah Shnong bah Andrew.

U la bynrap, “60-70 hajar ki nongshong shnong kam dei ka kam kaba suk ban pynbiang um. Ki paidbah ki khnium bha ia ka um bad kum ka MLA ka donkam ban shim khia ia kane ha ka shnong ruh ka la ju iakren ia kane ha ka nongmihkhmat”.

Kawei pat ka jingeh ha ka shnong Laitumkhrah ka dei jingbret bad lum ia ki niut, ha kaba ka dorbar shnong ka la iakren bha ia kane bad la thaw ia ka komiti ban peit ia kane bad ka donkam ban iatrei kham janai. “Sngewtynnad ba hapoh ka jingialam u Myntri Rangbah ka jylla u Conrad K Sangma bad ka jingshim khia u Chief Secretary bah Donald P Wahlang kumno ban pynkhuid ia ki jingdonkam, ka dei ka sienjam kaba donkam bha kumno ban pynkhuid ia ki wah, ban pyniakhlad ia ki jaboh. Ngim lah ban ap tang ha ka sorkar ban leh hynrei ka dei ki paidbah ki dei ban shim ia ka jingkitkhlieh”, la ong u bah Andrew.