Ka la dei ka por ia ka Katrina, ba kan wad lok bad ioh khun noh, ong U Salman

Ha ki khyndiat sngi ba ladep, haba kren paidbah halor ka phlim thymmai jongu, kaba kyrteng Bharat, U Salman Khan, ula shah kylli jingkylli shaphang ka Katrina Kaif, kaba u ia ak phlim lang bad ia kaei ka kam, kaba ka dei ban trei nangne shakhmat.

Halor katei ka jingkylli, U Salman, u da pyrkhat jylliew jingmut bad hadien kata, u sa ong “Ka dei ban wad lok noh bad ban kha khun noh”. Halor katei ka Katrina, kaba don lang, ka la kynthoh da kaba ong ba katei ka jingkylli, ka thew pynban kumba iakren ia u doktor lane ia u engineer bad U Salman, ula jubab biang “Lada ngam dei shuh u aktor, kaei ka kam, kaba ngan dei ban trei. Hato nga lah ban long u doktor lane u engineer?” bad u ong ba ka jing ia poi kha bad ka jing ioh khun, kan dei ka kam hi, namar ka dei kaba hap trei baroh shisngi.

Halor ka jingkylli kaba ia u pat, ba lano un ia poi kha noh, U Salman, u iathuh ha kawei ka prokram telebishon Aap Ki Adalat, ba un sa ia poi kha, yn da la kut lut ki mukotduma jongu ha kashari bad lada jia ba hap shong phatok, kumta un sa ia poi kha, ynda la mih na phatok.