|
Nga da sngewkmen ban iohi ba phi shim khia ban leit jurip ia ka jingkhapngiah ka Police Bazar bad lehse ha ka jingkynmaw jongnga phin dei u myntri ba nyngkong ban leit jngoh kyrpang ia kane ka jaka na ka bynta ban peit ia ka jingkhuid jingsuba jong kane ka jaka ba pawnam ha ka ri jongngi. Kat kum ka jingiohi bad ka jingshem jongnga ka long ba ka long kaba eh bha ia ka sorkar ban teh lakam ia ki briew kiba mlien ban biah ban bret pathar ia ki niut bad ki plastic. Hynrei ka don ka lad kaba paka bha ban teh lakam ia ki riew bret/biah pathar kulmar bad kata ka long ban buh ia ki khynnah Khasi jongngi ha man la ki lad ki dong ki iew ki hat ban peitngor ia ki nongbret jakhlia kulmar bad ka kamram jong kine ki nongpeit ngor ka long ban shainkuna ia kiba lap ba leh pyrshah ia ka ain. La kumno kumno ka kuna ka dei ban long 500 tyngka shaneng. Ki nongpeitngor ia ka jingkhuid jingsuba ki dei ban don ka receipt book bad ruh ban leh hok ban thoh hok ymdei ban shu thep ha pla ia ka pisa ba lum na ki nongpynkhein ain. Kane kan iarap ruh ban ai kam ai jam ia ki khynnah samla bymdon kam donjam. Lada ngi peit na ka jingjaboh ka sor Shillong ha ki dong baroh bad lada ka sorkar kan pyntreikam da kane ka buit ba thymmai, ka sorkar kan ym donkam satia ban bei tyngka hynrei tang na ka kuna ba ioh na ki jinglehsih jongngi ki nongshong shnong ruh kan lah da kaba suk ban siew tulop sha ki nongpeitngor. Nga iohi ba lada ka sorkar hi ka don shisha ia ka jingthrang ban rah ia ka khuid ka suba ha ka nongbah Shillong dei tang kane ka lad kaba lah ban teh lakam ia ki briew ban sumar khuid ia ka sawdong sawkun jongngi. Ki kyndon ruh ki dei ban long kumne ba lada don ki niut ki nier ha khmat dukan jongno jongno, u lane ka trai dukan ki hap ban siew ia ka kuna, kam pher lada ki dei ki dukan rit ne dukan heh, dukan ba die waidong ne dukan ba die madan. Namar ba ki briew jongngi ki lapmiet ban ap tang sha ka sorkar ban leheiei kat kaba donkam wat na ka bynta ka khuid ka suba kaba ngi dei ban shim ka jingkitkhleih nalade iwei pa iwei. Kumta Bah myntri sor ba don burom sngewbha leh noh da kane ka buit ban teh lakam shisyndon. Ki riewpeitngor kiba ka tnad jongphi kan thung ruh pynsngewthuh ia ki ba kane ka kam ka dei tang ka kam contract bad ka tulop kaba kin ioh kan long ba ki dei ban don ha ki jaka buh ia ki ban peingor bad ka jingsiew kan long kat kum ka jinglah jongki ban peitngor bad ban dainkuna ia ki nonglehsih. Khnang ba ki samla kiba dei peit ia kane ka kam kin ym sngewthuh bakla ba ka dei ka kam sorkar. Ka kam kaba ki samla peitngor ki dei ban leh ka long tang ban peit mano ba biah kulmar mano ba bret niut plastic kulmar ym pat ban pynkhuid ia ki niut ki nier ki nongpynkhuid ia ka jakhlia jaboh kin dei beit da ki trai ba bret ryngkat ruh bad ka fine. Ka por ka la dei phi Bah Myntri sor ban pyntrei noh da kane ka buit namar ymtang ba ka Nongbah jongngi kan khuid kan suba hynrei kin bun ki samla ki bymdon kam donjam ruh ki ioh kam ioh jam bad ki khynnah samla jongngi kin sa pyrto ia ka jinglehbha jongphi. Lada leh kumne kito kiba mlien ban lehsih ruh kin hap pyrkhat arsien ha shwa ban leh.
Khublei Shibun
Angel Mac Suting
|