AIS Suja
Ka kyrteng halor ki kyrteng baroh, dei ka kyrteng ‘Jisu’. Ka jingmut jong ka kyrteng ‘Jisu’, ka mut “ba yn pynim ia ki briew baroh na ki pop jong ki”. Mathaios 1:21. Haba ong ia ki briew baroh, kam mut tang ia kiba la long Khristan hynrei ia ki briew ka pyrthei baroh bad Jiw bad Greek bad Jentil bad bym long Jentil, uno uno u briew uba la wan sha kane ka pyrthei la dep siewspah ia u da ka dor ka snam u Jisu, kaba donkam ba u briew un leh ka long tang ban ngeit ba ka kyrteng u Jisu ka donbor ban pynkylla (transform) ia u na ka jinglong barim sha ka jinglong bathymmai. Namar u Jisu u long uta u khunlangbrot jong u Blei, uba kit noh ia ki pop ka pyrthei”. Ioanis 1:29. “Uei uei uba ngeit ha u, un ym jot shuh” Ioanis 3:16.
Ka ktien u Blei ka ong –”Ym don ka jingpynim hano hano ha uwei pa uwei pat: naba ym don kawei pat ka kyrteng hapoh ka bneng ia kaba la ai hapdeng ki briew, da kaba ka dei BA YN PYNIM IA NGI”. Ki kam ki Apostol 4:12. Ym don da kawei pat ka kyrteng blei jong kane ka pyrthei kaba lah ban mab pop kaba lah ban pynkhiah kaba lah ban pynim pat ia kiba la iap, ban pyllait na ka dujok na u ksuid bad u soitan ba ha ka kyrteng u Jisu uba na Nazareth ki ksuid ki phet iap, ka dujok ka khynniuh. Ym don da kawei pat ka kyrteng kaba lah ban mab ia u nongpop uba khraw lait na ka kyrteng ‘Jisu’, u Jisu uba la iap bad ula mihpat.
U Apostol Petros ha ka por ba u don hapoh ka dorbar ula ialap da kaba ong – “Ba da ka kyrteng u Jisu Khrist uba na Nazareth ia uba la sahnarphna ma phi, ia uba u Blei u la pynmihpat na kiba iap, da uta kein une (Petros) u ieng hangne ha khmat jong phi uba la khiah khran” ki kam ki Apostol 4:10.
“U Jisu u long uta u KTIEN uba la don bad u Blei, uta u long u Blei” Ioanis 1:1. “Une ula don naduh mynnyngkong bad u Blei” Ioanis 1:2. “U long u Jingshai ban pynshai ia ki briew baroh” Ioanis 1:9. U Jisu Khrist u long kham khraw ban ia u Moses” Hebru 3:6-6. U Jisu u khraw ia u Adam, u khraw ia u Abraham, ia u Daniel bad ia kiwei de wat la kine ki la don shwa ha pyrthei ban ia u Jisu, hynrei u Jisu u la don lypa naduh bymjukut. Haba ym pat thaw briew ha ka pyrthei, u Jisu u la don lypa ha bneng. “U long u Blei” Mathaios 3:17.
Ka daw ba u Jisu u la hiar sha ka pyrthei dei namar ba la teh mraw ia ka pyrthei da ka pop bad u soitan bad ym don shuh da kawei pat ka lad ban pyllait mraw ia u briew pyrthei lait noh sa tang ka jingaiti noh jong u Blei ia la u khun ban shah haduh ka jingiap halor ka diengphna. Ka daw ka long ba u Blei um mon shuh um pdiang shuh ia ki jingknia ainguh kaba da ki mrad bad da ka snam ki mrad. Namar u soitan Lucifer u la trei donbor ha ki briew naduh ki por u Noah bad u Lot bad ter ter. U Blei u iohi ba ka jutang kaba rim kam lah shuh ban pyndam ia ki pop”. Lada kata ka Jutang kaba Nyngkong ka long ka bym duna, yn ym da la wad jaka ia kata ka ba AR”. Hebru 8:7. “ka Jutang Bathymmai” bad ula pyllong rim ia kata kaba Nyngkong. Te kata kaba nangrim bad la nang thymmen ka la jan duh noh” Hebru 8:13.
Dei na kane ka daw ba u Blei da ka jingieit bah naduh bymjukut, ula phah ia u khun sha ka pyrthei ban pynim ia ki briew na ki pop. Ha shwa ba u Blei un phah ia u Jisu sha pyrthei u la iathuh shwa ha ki Nongiathuhlypa (Prophets), uwei dei u Isaiah. U Isaiah u ong – “Namarkata u Trai hi un ai ka dak (Sign) ia phi; ha khmih ka Theisotti kaba punkhun, kan kha ruh ia u khun, yn khot ruh ia ka kyrteng jong u IMMANUEL” Isaiah 7:14, ka mut u Blei lem bad ngi, u Blei u la wan sha pyrthei ban long lem bad ngi.
U Prophet Mikah ruh u ong – “Hynrei ma pha ka Bethlehem Ephratha la pha long kaba rit hapdeng ki hajar Judah na pha kein un mih ha nga uwei u ban sa long u Nongsynshar ha Israel; uba ka jingmih jong u ka long na mynhyndai (na bymjukut)” Mikah 5:2.
Hadien bun hajar ki snem jingiathuhlypa u Blei u la phah noh ia la u khun sha ka pyrthei. Naduh ka por ka jingshah ringmraw ki Israel sha Babylon haduh ba la kha ia u Jisu Khrist, ka la long 14 pateng. Mathaios 1:17 kumta ka pateng bynriew naduh u Abraham haduh ba la kha ia u Jisu Khrist, ka la long 42 pateng.
U Blei u la pynurlong (fulfil) ia ka jingiathuhlypa ki Nongiathuhlypa ba yn kha ia u Khun u Blei sha ka pyrthei, kumta la kha ia u Jisu ha u snem 3 B.C (ka snem ba Lai), ha Bethlehem Judia. Mathaios 2:102 kum u briew bad kum u Blei, u Jisu u la iaid ha kane ka pyrthei u la pyndep ia ka Mission ba u Blei u Kpa u la phah ia u naduh bymjukut. U Jisu u la leh shibun kiei kiei. “Te don ruh shibun kiwei pat kiei kiei kiba u Jisu u la leh, kiba lada yn thoh ia ki kawei pa kawei, nga tharai ba wat ka pyrthei hi kan yn ngiam ia ki Kitab kiba dei ban thoh – Amen” Ioanis 21:25.
“Kane ka long ka jingphla u Ioanis u synran u Jisu, uba la phla bad uba la thoh shaphang u Jisu bad baroh ka long kaba shisha” Ioanis 21:24.
U Jisu u dei u khun langbrot jong u Blei, u Ioanis u kdew da kaba ong – “Ha khmih u khunlangbrot jong u Blei uba kit noh ia ki pop jong ka pyrthei” Ioanis 1:29. U Jisu Khrist u langbrot jong u Blei uba hap ban shah knia halor ka Diengphna ban pynkhuid ia ka pop da ka snam jong u. ‘Namar katba kum ka Hukum, Nga lah ban ong ba la jan kiei kiei baroh, la pynkhuid da ka snam, bad khlem kaba pynmih sam, ym don jingmab” Hebru 9:22.
Dei kumta ba u Jisu Khrist u la paw ha khmat u Blei na ka bynta jong ngi ym da kaba un ainguh bunsien ialade bunsien ……. Hynrei tang shisien la pynpaw ia u ha kaba kut ki ia, ia ka ban pyndam noh ia ki pop da kaba knia ialade. U Khrist ruh haba la knia ainguh tang shisien ia u ka ban bah noh ia ki pop kiba bun” Hebru 9:24-28.
Na kata ka daw kein, u Blei um pdiang shuh ia ka snam ki mrad lymne da ka snam ki blang bad ki khun masi, hynrei da ka SNAM JONG U HI, u la leit rung tang shisien sha kata ka jaka kyntang. Lada ka snam ki blang bad ki masi kyrtong bad ka dpei masi lud ba la synreit ia kita ia kiba la pyntngit, ka pynkhuid sha ka jingpynkhuid ia ka doh, te kaba katno tam KA SNAM U KHRIST uba da u Mynsiem bymjukut u la ainguh ialade ba khlem jingduna ha u Blei” Hebru 9:12-13.
Kumta, “Ka bym lah ia ka snam ki masi kyrtong bad ki blang ban kit noh ia ki pop” Hebru 10:4. “Hynrei la pynkhuid ia ngi da kata kaba ainguh ia ka met u Jisu Khrist TANG SHISIEN AI. Une u Jisu haba u lah ainguh tang kawei ka jingknia namar ki pop junom” Hebru 10:10-12.
“U briew uba ibein ia ka Hukum u Moses, u iap noh khlem jingisynei. Te ka jingpynshitom ba kham jur katno phi tharai kan long ia uta uba iuh hapoh ki kjat ia u khun u Blei bad ba la niew bymkhuid ia ka snam ka Jutang da kaba la pynkhuid ia u? Bad ba u leh bein ia u Mynsiem ka jingaiei?” Hebru 10:28-29. Kumta, ka long kaba itieng ia ka ban hap ha ki kti u Blei ba im” Hebru 10:31.
Kumta, kynmaw ba la dep siewspah ia phi na kata ka jinglong jingim bathala jong phi da ka snam bakordor u khunlangbrot u Blei ba khlem pop ba khlem thoh bria ka jong u Khrist kein” 1 Petros 1:18-19. “Uba dalade hi u la bah noh ia ki pop jong ngi ha ka met jong u halor kata ka Dieng ba haba u la iap noh sha kita ki pop, ngin ioh im sha ka hok: uba da ka jingjngem snam jong u la pynkhiah ia ngi” 1 Petros 2:24.
Kumta ym don da kawei pat ka kyrteng hapoh ka bneng ka pyrthei kaba lah ban mab ia ki pop, kaba lah ban pynkhiah ia ki jingpang, kaba beh ia ki ksuid lait noh ha ka kyrteng u Jisu. “Ym don ka jingpynim hano hano ha uwei pat naba ym don kawei pat ka kyrteng hapoh ka Bneng ia kaba la ai hapdeng ki briew da kaba dei ba yn pynim ia ngi” Ki kam Apostol 4:12.
“Naba u Blei um, shym la phah ia la u khun sha ka pyrthei ba un pynrem ia ka pyrthei – hynrei ba yn pynim ia ka pyrthei da U” Ioanis 3:17. “Ba da ka kyrteng u Jisu uba na Nazareth ia uba la sahnarphna maphi ia uba u Blei ula pynmihpat na kiba iap, da uta kein une (U Paul) u ieng hangne ha khmat jong phi uba la khiah kran” Ki kam ki Apostol 4:10.
“Jisu” ka long ka kyrteng kaba ki angel bad ki riewkhuid ki ieit ban iaroh.
Namar, kata, phi ithuh ia ka jingaiei u Jisu Khrist uba u Trai jong ngi? Ba u la long uba RIEWSPAH, pynban u la wan long DUK na ka bynta jong phi, KHNANG BAN PYNRIEWSPAH IA PHI DA KATA KA JINGDUK JONG U”. 2 Korinth 8:9
“Kane ka long ka khubor babha, ka jingkmen bakhraw ia ki briew baroh naba ha kane ka sngi la kha ia phi ha ka shnong u David, IA U NONGPYNIM U KHRIST U TRAI” Loukas 2:10-11.