Da U Scholar Lawriniang
Ka kyntien DONBOK ka dei kawei ka kyntien ba ki jaitbynriew khasi salonsar ki ju pyndonkam bha bad ha ka phareng ki ong (Good Luck) kane ka kyntien DONBOK kaba ngi ki khasi ngi ju pyndonkam ha kiba bun ki bynta kum ha ka pang ka shitom ngi ju ong :-
👉Donbok phin shait phin khlain noh.
👉 Donbok sa leit / poi suk.
👉Donbok nangbha ka kamai kajih.
bad kiwei kiwei.
Kane ka kyntien Donbok ka long kum ka kyntien phah lane ai jingkhublei kyrkhu kyrdoh ia kito ki briew ba phi ia shem ha kano kano ka khep.
To ngin shu ia phai liak halor kane ka kyntien kamut aiu kane ka kyntien DONBOK?
Ka kyntien donbok ka don ia ka dor kaba khia thew hi ha ka jingim ki Khun khasi jongngi salonsar hynrei ka long kaba sting ka jingthew pat ha ki khristan ba la ngeit ha U Blei. Ka kyntien Donbok ka dei ka kyntien ba la pyniasoh ha ki ar bynta kawei Don kawei Bok, Bok kat kum ka jingmut ba la batai kamut Ka Nusip (Ka bok ka nusip) bad shait ong ruh kiba bha la ka Bok ka Nusip naduh hyndai haduh mynta ki ong iakata ka kyntien. Bad haba ong ka Bok kamut kaba shu wan hap khlem poi pyrkhat lane ong noh kumba eit ka sim tyngkhat lano eh ba ki briew kin mad ia kane ka Nusip, ha ka Nusip kaba mut phi hap ban pdiang katba ka wan ,lada dei ka ba sniew ne ba bha ruh, kane ka kyntien kam iahap satia bad ki khristan namar balei? Ngi ju ong Donbok phin shait phin khlain noh, lane donbok poi suk / leit suk, lane donbok bha kamai kajih. Hato ka jingkoit jingkhiah ka jingsumar sukher ka jingkyrkhu ka wan na ka bok ka nusip ? Ka bok bad ka nusip kam ju wan jia ha kut ki briew, kaba mut ki briew ki ba pang lada ki bha nusip kin koit kin khiah lada kim bha nusip kin iap .
Hato mano ba bat ia ka jingkoit jingkhiah? ka jingkoit
jingkhiah kam shym la wan satia na ka bok ka nusip namar ba ka jingkoit jingkhiah ka dei ka bynta ba U Blei u la pynkhreh kyrpang ia uwei pa u wei u briew ha ka pyrthei, ym ba u pynkhreh ia ka kum ka Nusip ia ki ba u mon un ai jingkoit jingkhiah ia ki bymmon un ym ai, hynrei U Blei u la ai ia baroh salonsar. Ka ktien U Blei ka ong:
Ngi don kane ka jingsngewshngain ha U Blei, ba la da ngi pan eiei kat kum ka mon jong u , un shah shkor ia ngi, bad ngi ioh ia ka jingkyrpad jong ngi na u. (Ioan 5:14-25)
Da ka jingaiei la pynim ia phi lyngba ka jingngeit bad kane kam long ka jingleh jongphi ,ka long ka jingai Blei, lymne ka long ka bainong kaei kaei ba phi la ioh, ïoh don mano mano u ban sngewsarong.(Eph 2:8-10)
Kumta lada ngi leit peit ia ki ba pang ba shitom lane kren sngewnguh ia ki lok ki jor kane ka kyntien kam long satia kaba khia thew ba ki briew kin sngap, ban ong Donbok phin shait phin khlain noh namar ba shu ap ei lada long kan long lada ym long kan ym long ba ka dei ka bok ka nusip, hynrei kaba khia thew bad kaba longshisha ka long lada ong da ka kyntien KYRMEN ,
KYRMEN phin nang shait khlain noh .
KYRMEN sa poi suk.
KYRMEN nangbha ka kamai kajih.
Namar ka jingapkyrmen jong ngi ka long na U Blei ba im ym na ka bok ka nusip lane na kita kiwei kiwei pat ki blei,
Mame ko Trai me long ka Jingkyrmen jong nga.( Salm 71:5)
Hynrei U niewkor ia ki ba tiengburom ia U, ia kiba kyrmen ha ka jingieit jong U. ( Salm 147:11).
Jingkynthoh: Kane ka jingthoh ka kham thew bad mut eh kyrpang ia ki Para Khristan.
Khublei Shibun
Ka kyntien donbok lei ka dei ka kyntien tim lada pyrkhat bha namar ngi u khasi ba kham iabishni iwei ia iwei bad ngi ju ong donbok keiñ ba ka/u dang jem ne im dano te ka/u lah dei ban iap lane donbok keiñ ba ka/u dang poi suk dano te ka/u lah dei ban accident lane donbok keiñ ba ka dang ioh kamai lymne te ka/u lah shu khrong bad nga sngew ba ka dei ka kytien tim. Kum u bangeit te ngim dei ban pyndonkam iakane ka kyntien bad ngi dei ban kren iaka Jingkyrkhu, ngi dei ban ong, To U Blei Trai Kynrad Un kyrkhu iaphi, U Trai Un Kyrkhu bad Un pynkoit pynkhiah iaphi, U Trai Un kyrkhu ia ka kamai kajih jongphi bad U Trai Un kyrkhu bad Un don ryngkat ha ka lynti ba phi iaid maphi, tang kine hi kiba nga kum u bangeit nga sngew ba ngim dei ban pyndonkam ia ka kyntien donbok namar ngim dei ban ngeit ha ka bok ne ka nusib hynrei ngi dei ban ngeit ha ka Jingkyrkhu ka jong U Blei Trai Kynrad, khublei