Ka kynhun ki myntri ka sorkar MDA, kan neh beit kumjuh, ong u Conrad K Sangma

Shillong: U Conrad K Sangma u ba dei u Myntri Rangbah ka jylla bad u ba dei ruh u President jong ka National People’s Party(NPP) u la ong ba ka sorkar kan nym pynkhih satia ia ki kynhun Myntri ka sorkar Meghalaya Democratic Alliance (MDA) kiba la don lypa hynrei kan sa peit pat ia ki kam ba kan ai sha ki 5 ngut ki MLA jong ka seng Congress kiba la wan ban ai ka jingkyrshan bad snohkti lem bad ka sorkar synrop (MDA).

Ha kaba iadei pat ka jingthut jong ka seng Bharatiya Janata Party(BJP) ia ka seng Congress ban don lang ha kajuh ka sorkar, na ka liang u Conrad K Sangma u la ong, “Ngi dei ban sngewthuh ba ki la phah ia ka shithi ban ai ka jingkyrshan bapura ia ka sorkar halor ki mat ba donkam ia ka jylla. Kumba nga la iai ban ia kajuh shi kajuh, kane kan nym ktah ia ka jingiadei bad ka jingiakut kaba la ia kut bad kiwei pat ki seng saiñ pyrthei kiba iasynrop lang ha ka sorkar”.

U Conrad K Sangma u la ong ruh ba kumta ki seng saiñ pyrthei kiba don hapoh ka sorkar MDA kim donkam ban pyrkhat da kumwei pat hynrei ki dei ban peit ha kata ka liang kaba bha ba ka long kum ka sieñjam kaba bha ha kaba ki nongialam ki la ia wan lang hajuh ban ia trei bad ia bah lem na ka bynta ki mat kiba donkam tam jong ka jylla baroh kawei.