Na ka bynta ban teh lakam ia ka jingpynlut maphot jong ki kandidet MP, ha shwa ka elekshon, kumta ki bor pyniaid jong ka Ghaziabad district, ki la buh da ka dor kaba thik thik, na ka bynta ki jingdonkam bapher bad ki jing pynlut pynsep jong ki kandidet.
La mang ba ka jing pynlut jong ki kandidet ha kane ka elekshon ka long T.70lak bad ia katei ka T.70lak, la pyniahap ba lada dei ban thied samosa lane pakora, u dei ban shongdor T.10 uwei, u balushahi T.200 shi kilo bad u kaju barfi T.750 shi kilo. Nangta lada dei ban thied soh, la buh ba ki soh apple, ki dei ban long T.100 shi kilo bad ka kait ka dei ban long T.50 shi dorjon.
“Bun na ki kandidet ki ju lehniam puja bad ki don ruh ia ki ophis trei kam jongki bad kine ruh la buh da ka dor. Ka dor jong uwei u sadhu, ba un leit sha kitei ki jinglehniam puja, ka dei ban long T.1,100 bad ka dor jong uwei u soh snepkor, ka dei ban long T.20 uwei bad sa ki ksai kiba pyndonkam, ha kaba thang ki dei ban long T.10 bad T.3 uwei uwei. Ngi la buh da ka dor kaba biang thik, na ka bynta kiba iadei bad ka jingpynlut elekshon jong ki kandidet” ong u ophisar ba peit ia ka jing pynlut ki kandidet.
Nangta na bynta ki kali kum ki SUVs bad ki bos bad ia ki Maruti 800 lane ki SUVs bad ki deluxe buses, la buh dor hapdeng ka T.1,000 haduh T.1,0,000 na ka bynta ka jingleit kaba 200kilometre bad kan don sa ka jingsiew tam, lada palat ia katei ka jingjngai na bynta ki kali kiba don AC bad ki bym don AC ruh kumjuh.
Na bynta ki kali kiba kham remdor kum ki Mercedes, Pajero, Fortuner, bad kiwei la buh dor ba kan long hapdeng ka T.8,000 haduh ka T.12,000 na ka bynta 200 kilometre bad lada palat ia kata, yn hap ban siew tam bad lada dei ban sah miet ruh. La bthah ruh ia ki briew jong ka tnat elekshon, ba kin bud, kat shaba ki leit ki kandidet bad kin sngap ia ki jingkren bad kin ring video bad ia kitei ki video, kin pynpoi sha ka tnat pyniaid elekshon jong ka District, ong U Sunil Kumar, Additional District Magistrate (finance & revenue).
Phi don ban ong eiei?