Shillong 6 Rymphang: Kum shibynta ban dang pynkhlain bad dang tehsong ia ka kur , ki Rangbah nongialam jong Ka Kur Manih ha ka 5 Tarik Rymphang 2024 , ki la lum la lang ia baroh ki Kur Manih na kylleng ka Ri khasi Jaintia bad pynlong ia ka jingialang Kur kaba 9 ha ka Shnong Diwon Ribhoi District.
Ha kane ka sngi nalor ki kyntien ban sneng ban khraw ia ki pateng Jong ka kur Manih la ioh ruh ban wanrah ia ki kaiphot trei Kam ki Unit bapher bapher ki ba kynthup ia ka Shillong Unit, ka Nongtluh Unit, ka Nongtham Unit, ka Nongbri Unit bad na u Statistian.
Ha kane ka sngi la ioh ruh ban pynthymmai ia ki nongkitkam bad ki dkhot ka CEC na ka bynta ka samoi treikam Jong u snem 2025-2028, ha kaba ia kane ka Samoi trei Kam ka Kur Manih yn ialam da ki Rangbah kur kiba kynthup ia u bah Binal Manih Kum u Adviser, u bah Glarbert Kum u chairman, u bah Tarson Manih Kum u Vice Chairman bad Kiwei Kiwei .
Kum shibynta ban dang ai mynsiem ia ki khun ki pyrsa ki ba dang don ha ka jingpule , ka Kur Manih ka la ioh ruh ban pynkup burom ia ki 3 ngut ki samla na ka kur kiba la pass bha ha ki exam ba pher bapher kine ki ba la shah pynkup burom ki kynthup ia i samla Elsarisha Manih, u samla Elfinstone Manih bad u samla Derex Markwell Manih.
Ha kane ka sngi la ioh ruh ia ka jingshad jingrwai na ki Unit bapher bapher ha ryngkat ka jingpynshoh biej da ka jingshad tynrai na ka Injal Unit .
Haba kren hakane ka sngi u Adviser ka Kur Manih u bah Binal Manih u la kyntu ban long kiba im tipbriew tipBlei , bad dei ban iaid ha ka jingshisha kat Kum ka kur ka jait bad kan dap ia ka Ri Khasi baroh .
U la kdew ba ha ki por mynshwa ki Manih ki Don tang ha Nongtluh hynrei mynta ki la poi kylleng sawdong ,bad kane ka jingialang ka long kaba donkam ban ithuh ithaw bad dang pynkhlain bad tehsong ia la ka kur . U la kyntu ruh ba ki Manih ki dei kiba hap hapoh ka Ri Khasi , bad baroh ki dei ban bud ia ka jingshim jait na ka kmie.
Lada ngi kdew halor ka thymmei ka Kur Manih lyngba ka jingiathuh u Rangbah kur u bah Binal Manih u la ong ba Ki Kur Manih ki dei kiba wan na ka Hima Kulong kaba don ha Assam , kawei na ki Kur Manih ka la wan shong wan sah noh ha ka Hima Nongtluh, bad nangne ki sa pra kylleng ki Kur Manih ha ka thain Ri Khasi bad Jaintia.
Ia ki Kur Manih hi la ai ka kyrdan ban bishar bad synshar ha ka thain Nongtluh kum u Doloi Jong ka Raid Nongtluh bad uwei u tymmen shnong ka Nongtluh, nalor kane la pynkup bor ruh ia ka kur Manih ban pynkup pynspong ia u Syiem Nongtluh haduh mynta.
Phi don ban ong eiei?