Ka ktien tynrai ka pynim ia ka Ri jong ka Jaitbynriew

Da U Purningstar Shabong

Haba ong ‘Ka Ri’ lehse kin bun ki jingmut kiba phin batai kat kum ka jingsngewthuh jong phi iwei pa iwei. Hynrei katkum ka jingsngewthuh jong nga, haba ong ‘Ri’ ka mut ka Khyndew kaba kdup kaba piam, kaba ai buiñ kaba ai thiang, kaba bsa kaba pjiah ia u khyndai symbai u khyndai rnai, ki mrad ki mreng la kiba her ne kiba par bad khamtam eh ia u Khun Bynriew uba long ma u u Syiem Nongïoh Hukum u ban shynshar ïaka Pyrthei kat kum ka Hok bad kat kum ka Jutang. Kumta kata kaba sumar sukher bad kaba pynsan bad pynsah ïa kitei kiei kiei baroh la khot ka Nongri lane la khot lyngkot ‘Ri.

Kumta to ngin phai noh wak sha ka tei ka phang kaba ong “Ka ktien Tynrai ka pynim ïa Ri jong ka Jaitbynriew”. Ki sakhi kiba ngi kum ka pateng bynriew ngi ïohi kyndiang ba uwei pa uwei u lum, kawei pa kawei ka them bad ka ranab ki don la ka jong ka kyrteng ka ba ki Longshwa jong ngi ki khot sien kat kum ka jinglong jingman jong kita ki jaka kiba lah ban long kat kum ka Khana Tang ba la pynkup pynphong da ka Meiramew ha kata ka jaka ne ki jingjia kiba jia ha kata ka jaka. Ki Longshwa jong ngi kim ju khot kyrteng madei mata, hynrei kida peit bnaih bad pynïahap dur iaka jinglong jong ka jaka khang ba ka nam, ka jingjia bad ka Khana Tang kaba don ha kata ka jaka kan long kaba neh ha ki pateng bynriew ki ban dang wan.

Lehse bun na pdeng jong ngi ngim da sngew khia thew eh halor ka jing sien kyrteng ki longshwa jong ngi ïa ki lum ki wah, ki them ki ranab kiba don sawdong kane ka ri ki Laiphew Syiem bad Khatar Doloi ne ka Ri u Hynñiewtrep Hynñiaw-wasa jong ngi. Ban ïa tip bad ïa shai ïa kata, to mynta ngan pynkynmaw sha phi kumne harum.

Kumba ngi tip ba ki Syiem jong ngi ha ki por hyndai ki pynïar la u pud u sam na ka bynta ban pahun ki khun ki hajar n aka bynta ka jaka shong jaka sah, ka jaka rep jaka riang bad kumta ter ter. Haba ki pynïar la u pud u sam kumta, ki buh dak da kaba shu pruid dak ha ki maw ne da kaba ki shu sieh da u Mawbynna bad ruh ban sien da ka Kyrteng ha ka kyntien lajong ïa kita ki jaka. Kumta haba la lah ban sieh mawbynna bad haba la lah ban sien kyrteng kata ka mut la ïoh ban kam trai bad long kynrad ïa kata ka jaka. Nuksa, phin ïohi ruh ba kano kano ka Ri ha ki por ba kham mynshwa haba ki leit ban kam nyngkong ïa kano kano ka jaka ki da buh dak bad sieh da ka lama jong ki ban pynpaw ba la ïoh ban longtrai da ma ki bad ha kum kata ka bynta kham ñiar ban don mano mano ban knieh noh ïaka jinglong trai jong ki ïa kata ka jaka. Kumta ruh ka jaitbynriew jong ngi ka ïoh ban kam trai bad longtrai ia kane ka Ri Lum u Hynñiewtrep shaduh ki ri thor ka daw ka long halor ki tei ki bynta la ba kdew haneng.
Hynrei kat dang ïaid ka pateng, u briew u dang shaïong bad dang be-rong noh ka jingtip jingshemphang shaphang ka Saiñpyrkhat jong ki riew hyndai jong ngi. Ha kaba ïaka jingmut bad ïa ka dor jong ka matti jong ki la shu kheiñ dewthala noh.
Ym tang kata, hynrei la long pynban kumba wan tyllep ka ïong-ngit ïong-ngaiñ. Ka daw ka long ba haba wan u poi wir u poi hap, u shong thap u shong kynrong uba wan mih kum u sierlapalang, kine ki briew jong ngi ki da burom bad nguh haduh sympriah kjat ha kaba kat kaba ong ma u, ki ong kaba dei. Haba u ong ma u ïa kano kano ka bymdei ruh, ki pynksan da kaba ong “Hooid kaba dei!”.Nuksa, haba u wan pynkylla kyrteng shnong kyrteng jaka ma u ïa kano kano ka jaka jong ka Jaitbynriew jong ngi, ma ngi ha ka jaka ba ngim ong em kam dei kumta, hynrei ki ïa pynbud lang pynban kat kaba ong ne kat kaba khot uta u poiwir. Bad dei halor kine kiei kiei baroh ba la jyllei ki kyrteng jaka jong ki poiwir ban ia ki kyrteng jaka trai ri khamtam ha ki thaiñ sor Shillong bad sha ki bynta kiba khap pud ruh kumjuh. Kumta kane ka jingshong kynrong noh ka saiñ pyrkhat jong kane ka pateng jong ngi bad ka pateng kaba dang shu leit shen, ka long ka bih kala bam jem ïa ki dohjem jong ka jiatbynriew bad ruh ka ban pynïap ruh ïaka Jaitbynriew jong ngi ha kano ma ka sngi bad ruh khlem artatien ngin sa duh noh ïala ka jong ka khyndew ka shyiap. Lehse haba nga ong ka long ka bih, phin ym patiaw than bad lehse phin ong ba shu pnah thylliew khlem bai wai une u nongthoh. Koit! kam pher ïa kata, hynrei to sngap pat ba nga ïathuh ne kren ïaka jingshisha ban ym babe bad duh longtrai ka pateng jaitbynriew jong ngi hala kane ka jong ka Ri.
Ha Shillong lane Shyllong la mih ki shnong jong ki poi wir kum ka Garikhana, Barak Valley, Cleve Colony, Risa Colony, Lachumere, Bishnupur bad kiwei kiwei kiba ym lah ban jer kyrteng lut hangne. Ym tang kata, sha ki thaiñ khap-pud lei lei ym idon jaka shuh ban thoh hangne ïa kita ki kyrteng shong jong ki poi wir. Bad haba ngi bishar bniah ïaka jing jyllei kitei ki shnong poiwir, ym lah shuh ban len ba Jaitbynriew Khasi jong ngi haduh mynta ka dang dei ka jaitbynriew jong ki mraw ne ka jaitbynriew shah teh mraw ka bym skhem bad ka bym ïaineh hala ka jong. Bad kane ka jing sngewtynnad jong ngi ban long ki mraw, shisien ka sngi kan pynduh jait naba ym don jaka ïa ngi ban shong ha kane ka Ri namar ba la duh noh ka jinglongtrai ïa kane ka Ri bad ba ngin ym lah shuh ban kam trai ïaka.
Lada ngi ‘said ksan haduh katno katno ruh, ha kano ma ka sngi bad ka por ngin sa kylla long ki poi wir bad ngin sa shu shah beh na kawei ka jaka sha kawei pat ka jaka jong ka pyrthei kum ba long kito ki jaitbynriew kiba la duh noh ïaka jinglong trai hala ka ri jong ki bad kiba la shah beh na kawei ka jaka sa kawei pat ka jaka kumba ngi ïai ïohi na ki por sha ki por ba ki don ki jaitbynriew kiba ngam kwah ban pynpaw kyrteng hangne kiba shah beh na kawei ka jaka sha kawei pat namarba ha kano kano ruh ka jaka kim longtrai bad kim ioh longtrai shuh.
Kumta, ban poi noh thik sha ka tei ka mat, nga kwah ban ong ba, lada kine ki jaka bad ki lum ki them, ki shnong ki thaw kin kylla noh sha ki Kyrteng Shnong jong ki poiwir kumba la kdew haneng, Hato phi mut dur ba ngin dang lah ban kamtrai ba kane ka dei ka Ri jong ngi? Hato phi la klet ba bun ki jaka kiba ka Jaitbynriew jong ngi ka duh noh bad ym lah shuh ban kam trai? Hato ngi don sakhi ban pynshisha? Hato kata ka sakhi jongngi kan long kaba shong aiñ bad kaba shong nia? Hato ka Hok bad ka Jingshisha(ïng bishar) watla ka bishar hok haduh katno katno ruh hato phi mutdur ban pynksan ïa ka jinglongtrai jong ngi? Hato phi la klet ïaka jingpyrta kaba ong “Khasi Go Back!”?. Watla ïa nga ha kito ki por ym pat shym la kha, hynrei haba nga ïohi ïa kito ki kyntien kiba la pyrta da ki poiwir kiba pyrta “Khasi Go Back!”, ka pyn phalang ïa nga sha ka jingsyier kiba lada ngim kyndit bynriew, shisien ka sngi ngin sa shah beh na kane ka Ri la jong ha kiwei pat ki heh paid poiwir.
Hawto ïa puson lang, kumno ngin pynshisha ba ka jaitbynriew Hynñiewtrep ka longtrai ïa kane ka ri ki Laiphew syiem bad Khatar Doloi lada ki kyrteng jaka ki dei ki ki kyrteng jong kiwei pat ki jaitbynriew. Nuksa, hato ngi nud ban ong baka Garikhana bad kiwei kiwei ki jaka ne shnong ba la ai da ka kyrteng nongwei kan dei ka jong ngi?
Hato kaei ka ban jia lada kum kine ki kyntien poiwir ki dang jyllei bad ïai jyllei? Ban kren ïaka jingshisha, lada ngi poi ha u pud ban pynshisha ïa ki jaka lada dei ha ki jaka ba long pdeng ne sha ki jaka khap-pud ruh, ngin ym jop da leilei ruh namar ba ka kyrteng jaka kam dei ka kyrteng jong ngi bad ka jingshisha kan pynksan b aka dei ka jaka jong ki dkhar namar ba ka kyrteng jaka ka dei ha ka kyrteng jong ki. Lada dei baka kyrteng jong ki jaka ki neh beit da ki kyrteng Khasi kata ka mut lada ngi pynshisha hangno hango ruh ka Hok kan pynksan beit ïa ka Jaitbynriew jong ngi. Bad ka long kaba shisha ba da leilei ruh ngin ym duh ïaka jing longtrai hala ka jong ka Ri.
Bunsein ki juh mih ki khep ba ngi kwah ban pynneh pynsah ïaka Kyrteng Trai-ri, hynrei ka long kaba ithamula shi katdei eh pat ban ïohi ba lada khot kyrteng dkhar-India ym bit, hynrei da khot kyrteng dkhar-ri nongwei pat sngew hieng, sngew long riew shai, sngew long ïa ryngkat kyrdan bad kita ki phareng (na ka ri nongwei) bad na kata ka daw ïa ki kyrteng shnong ne jaka bunsien ki briew jong ngi ki sngew hieng ban ai kytrteng ha ka kyntien phareng. Bad ïa kata ka kyntien phareng pat la sngew bad kheiñ baka dei ka kyrteng trai-ri. Dur ka banshot! ka jingbiej tasam aïu kum kane eh! kum kane ruh ka jingleh kam dei kam kam ki riew stad ne ka jaitbynriew kaba la shai ha ka bor pyrkhat, hynrei ka paw shai pynban ba ka dei pynban ka jaitbynriew kaba dum tasam na pdeng kiba dum tam.
Kumta, ngi dei ban sngewthuh ba, ban im ka Ri lajong ngi dei ban pyn-neh beit thik ïaka kyrteng shnong ne kyrteng jaka ha ka kyntrien trai-ri lajong ha baroh kawei ka Ri u Hynñiewtrep. Namarkata, kum ki Samla, Rangbah, Longkmie kiba la shai ka jingpyrkhat hala ka jong ka thymmei, ngi dei ban pynneh beit ïala ka jong ka kyntien shnong ne kyrteng trai-ri ia kino kino ki ki shnong ne ki lum ki wah bad ki them ki madan ha ka kyrteng trai-ri kumba la sien naduh ki Longshwa Manshawa. Bad lada ngi lah ban leh kumta, ki jaka jong ngi lada dei sha ki thaiñ khap-pud ne sha kino kino ki bynta kan ym duh satia namar ba Sakhi lyngba ka jinglongtrai la pynshisha da ka Kyrteng bad ka Khana tang kaba balei ngi khot kyrteng kumta ia kita ki jaka.
Namarkata ka daw, la donkam ba Sorkar Meghalaya bad khamtam eh ka KHADC bad JHADC ba kin thaw da ka kynhun ka ban peit bniah ïa kane ka kam bad ban pynthikna ba baroh ki jaka ha poh ka Ri u Hynñiewtrep ki dei ban long beit ha ka kyrteng trai shnong kumba la sien da ki longshwa jong ngi bad ïa baroh kito ki kyrteng jaka lada dei ki shnong ne ki lum, ki wan, ki them bad ki madan kiba la pynkylla sha ka kyrteng ‘khar-lieh ‘kharïong dei ban pynkylla lut noh baroh sha ka kyrteng trai ri. Bad ym dei shuh ban ithuh ïa kino kino ki jaka bad ki shnong kiba ai kyrteng ka ha kyrteng jong ki poi wir poi hap, hynrei dei ban ithuh noh beit ha ka kyrteng trai ri ïa baroh naduh nangthie, shaduh shatei, sep’ngi bad shaduh mih’ngi jong ka Ri u Hynñiewtrep. Bad hangta keiñ ka Hok jong ka jinglongtrai kan ïeng rasong bad ka jaitbynriew kan skhem la ka jinglong trai bad jing long kynrad ha kane ka Ri u Hynñiewtrep junom la junom katba kane ka pyrthei ka dang lah ban kdup ia ki jingthaw ba im. Bad kumta keiñ ka pyrthei kan ïohi baka Jaitbynriew Khasi ruh ka dei ka Jaitbynriew kaba la shai bad kaba don la ka jong ka Thymmei Longbriew kaba kynsai bad kaba ym bit ban ïa lehkai.
Ïa ka jinglong shai jong ka Jaitbynriew la ithuh na ka jinglong Tynrai jong ka, ym na tynneng bad kumta ngi dei namar kata ban ym khot kyrteng shuh ha ka kyrteng poi wir, hynrei ban khot beit da ka Kyrteng Trai-ri bad hangne keiñ ka Ri jong ka Jaitbynriew jong ngi kan im bad ngin ïai long kynrad hala ka Ri.