Ka ktien Registration kajuh kum ka Work Permit, wan tur ki nongbylla nabar bym lah ban pyndap na jylla, ong u bah Paul

Shillong:U myntri ka sorkar jylla uba dei ruh u nongaiktien ka sorkar u bah Paul Lyngdoh u la ong ba ka jingwan tur ki nongbylla ban wan trei ha kane ka jylla, ka dei namar ba ki trai shnong kim lah ban pyndap ia ka jingdonkam ka kam bylla.

Ha kajuh ka por, u la kubur ia ka jingong u Myntri Rangbah u Conrad K Sangma ba kam don ka work permit bad u la ong ba ha kane ka ain, ka dei kyntien Registration tangba ka jingtreikam ka kyntien Registration kampher na ka work permit hi.
U la ong ba ki nongbylla nabar kim dei ban sah palat ia ka 179 sngi bad man ka 179 sngi ki dei ban pynthymmai ia ka jingbuh kyrteng lane kin hap ban mih na ka jylla.

Haba kren mynta ka sngi, u bah Paul u la ong ba ka sorkar jylla ka la pynkylla ia kane ka ain Inter-State Migrant Workmen (Regulation of Employment and Conditions of Service) Act, 1979 ha u snem 2011 ha ka por ba u dang bat kum u myntri ka tnad Labour ha katei ka snem. U la ong ba ki sengbhalang ki khot ia kane ka ain kum ka Work permit hynrei kam don jingpher na ka ktien registration namar ba ki nongbylla kim lah ban sah palat ia ka sngi kaba la buh haba ki wan trei lymda ki pynthymmai ia ka.
U la ong ba ka lah ban don ka jingduna kum ka jingduna nongtrei ka tnad Labour hynrei kum ia kane ka jingeh, lah ban pynbeit.

U la ong ba ka jingwan rung ki briew sha kane ka jylla ka don ar bynta, kawei kiba wan kum ki nongwankai kiban ai jingmyntoi ia ki paidbah bad kiwei kiba wan kum ki nongbylla bad, kam don satia kano kano ka jingkulmar jingmut halor kine ki ar tylli ki bynta.