Ka ktien Khasi, kum ka ktien Sorkar

Bah RM Shabong

Ha kane ka khlam covid 19, ngi la iohi ia shibun ki jingkylla, ha ka jinglong jingman jong ki briew bad ha ki jingtrei kam jong ka sorkar ruh kumjuh bad kawei na kitei ki jingkylla, kaba ngi hap ban ai jing iaroh, ka dei ia ka jingkren khasi jong ki ophisar bad ki myntri sorkar, haba ki kren sha ki kotkhubor bad katei ka dei ka jingleh, kaba ngi dei ban ai jing iaroh shi katdei ia kane ka sorkar jong U Conrad Sangma, kaba la ailad ia ki myntri bad khamtam ia ki ophisar ban iathuh ia ki rai kiba man ka sngi lane ia ki jingpang, kiba iai jia ha ka ktien Khasi.

Halor kane ka phang, ka la dei ia ka Khasi Authors Society (KAS) lane ia kiwei pat ki seng, ba kin ai jingiaroh halor kane ka jingleh jong ka sorkar Jylla, namar ba mynta ki khubor, ba ki ai, ki rung beit beit ha ki shkor jong u luk u lak bad ba ym donkam shuh ban pyn kylla ktien lem da kiwei pat.

Ha ka Ri India baroh kawei, ngi iohi, ba ka jingkren ia ka ktien kmie lane ka ktien shnong, ka khraw haduh katta katta, ha kaba u myntri rangbah duh, ki myntri jong ka sorkar India, ki kren beit da ka ktien hindi bad nangta sa ki myntri rangbah ki myntri sorkar, ba ki kren da ki ktien shnong jongki bad ym ju kham ioh sngew bha, ba kin pyndonkam ia ka ktien English, ha kaba wat ha Parliament ruh, kiba nang hindi, ki myntoi tang kiba sngewthuh hindi, katba ki bym sngewthuh ki duhnong shibun.

Ha kine ki sngi, ba ka sorkar India, ka pynmih ia ka ain pule puthi kaba thymmai, kumta ka donkam shibun, ba ki nongialam sorkar Jylla, ba kin sngewthuh shai kdar, ba ka ktien khasi, ka dei ka ktien kaba la pdiang da u paidlang jong ka Jylla baroh kawei ha ki rilum Khasi, Jaintia bad kumta, ka donkam ban nang pynkhlain ia ka ktien Khasi bad bad ban pyn urlong ba kan dei ka ktien, ka ban ithuh da ka sorkar India bad ka phang kaba kongsan eh, ka long ba ngi dei ban pynshlur ia ka ktien khasi, ha ki skul bad nangta, ba ngi dei ban thoh bad kren da ka ktien kmie, ha ki ophis sorkar bad kiwei.

Lyngba ka khlam corona, ka la dei namarkata ba kan nym long tang ka jingsdang, hynrei ba ki myntri sorkar, ki ophisar sorkar, ki dei ban pynmlien nangne shakhmat ruh ban thoh bad ban kren da ka ktien Khasi bad katei kan long ka jing myntoi ia u luk u lak, uba dang bun, um bym nang satia ban kren da ka hindi lane ka English.