Ka ktien Khasi kaba riewspah, tangba duk bym nang pyndonkam

Shillong, 3 Naitung:
Ka ktien Khasi kam dei kaba duk shuh, haba ianujor bad kiwei ki jait ktien ha ka ri India, hynrei kawei ka jingduk ka long ba ki briew kim nang ban pyndonkam ia ka ha kiba bun ki khep.
Ka jingiathir halor ka phang,”Ka jingpynkylla ktien” ka la pynsngew ia kane kaba la pynlong da ka Sankardev kolej mynta ka sngi Thohdieng ba la iashim bynta da ki katto katne ki riew pyrkhat.
Ki nongkren ki la ban ba ki jingpynbeit bad ka jingpyndonkam kaba iahap tar katkum ka jingmut jong ki ktien, ka donkam bha na ki lad pathai khubor kiba pynmih man ka sngi ban hikai ia ki paidbah.
Ka jingkylla ktien bakla ki kot khubor, bun sien ka la ialam bakla ia ki paidbah bad ka pynlehrain ruh.
Ka Prof Badaplin War na NEHU, ka la ong ba ka jingpynkylla ktien ka don bun rukom, don kaba pynkylla ia ka jingkren jong u briew bad don kaba pynkylla ia ka jingthoh.
Ka la ong ba ban pynbeit ia ka jingmut jong ka ktien na ka jingspel ia ki dak, ka long kaba donkam ban sngewthuh ia ka jingmut jongka ktien.
Haduh mynta, ka rukom spel dak Khasi ia ki jait ktien kam pat don kaba long ryntih bad ka ai nuksa, kawei ka kot khubor ka spel da kumwei bad kawei pat ka spel dak da kumwei.
Hynrei ha kajuh ka por, kane kam dei tang ka jingbakla ne ka kam jong ki kot khubor, ki briew kiba don ha ki kolej, ki skulbah ruh ki don ka bynta ba kham kongsan ban leh ia kane.
Ka Kong War ka la ong ruh ia ka jingdonkam ban pynrung ia ka ktien Khasi ha ka 8th Scheduled ka riti synshar ka ri khnang ban ioh ia ka jingthuh watla ka ktien Khasi kam dei shuh kaba dang sahdien ha kiba bun ki bynta ha ka liang ka thoh ka tar, ka jingroi ki kot kiba har rukom.
Ka Kong Patricia Mukhim ka editor ka Shillong Times, haba kren plie ia kane ka jingiathir, ka la ong ba ki nonghikai Khasi ha ki kolej, ki skulbah ki dei ban ai ia ka jingthoh artikil shaphang kumno ban pynbeit ia ka jingspel dak bad ka jingmut jong ki ktien Khasi. Kane ka lynti ka dei kawei ka ban pynbeit ia ka jinglong ryntih ha ka rukom spel dak ia ki ktien Khasi.
Katba u editor u kot khubor Dongmusa, u Bah Billy P Domes u la ong ba ki nongpynkylla Khasi ia ki ktien kiwei, dei ban long kiba sngewthuh bha ia ka jingmut namar ba bun ki khep ba ki jingthoh ki pynbakla ia ki jingmut jong ki kyntien.
Shwa ia kane, ka kong Sukjai Swer na kane ka kolej, ka la ong ba ka jingpynriew spah ia ka ktien, kam dei ban sei tang na lade hynrei ka donkam ban shim kylliang ruh na kiwei ki ktien kumba la leh ka ktien phareng kaba kylla riew spah namar ka jingshim kylliang na ki jait ktien bapher bapher. Ia ka jingiathir la pyniaid da u Rangbah Sumar Sing Sawian uwei na ki nongthoh khubor ba paw jong ka jylla.