Ka ktem pulit ba pura ha shnong Khulia ka shnong khappud, ka thain Sunapur

Nongpoh: Ka jingangnud kaba la slem bah da ki paidbah kiba sah ha ki Marmain ha Ri Bhoi bad kumjuh ruh da u MLA ka Nongpoh, ban don noh kawei ka ktem pulit na Meghalaya, ka la wan ban urlong bad kata ka long ba myn hynnin, la plie paidbah noh ia ka ktem Pulit kaba pura jong ka Meghalaya kaba la tei hapoh ka shnong Khulia, ka shnong kaba don ha syndah eh bad ka Assam kata lyngba ka Sunapur.

Lah ruh ban kdew hangne, ba dangshen la buh ia kawei ka ktem Pulit hapoh katei ka thain bad kata ka long tang na ka bynta ban iada na u khing jingpang Corona Virus ne ban khang ia ka rung ka mih ki briew ha katei ka thain, hynrei ha katei ka por ym pat lah ban pynbna ba ka la dei ka ktem Pulit ka ban sa don shirta ha katei ka thain, hynrei dei tad haduh mynta ka sngi, la pynbna syndon ba katei ktem pulit kan san eh sah ha katei ka thain, kata la ka long ka Anti Dacoity Camp ne ka Border Police outpost, khnang ba kan lah ban ai jingshakri ia ki paidbah ha katei ka thain, kaba dei ruh ka thain kaba la kham jngai na ki Police Station, la ka long ha Byrnihat ne sha Nongpoh.

Haba plie bad pynbna syndon ia katei ka ktem pulit ba kan neh shirta ha katei ka thain, la sakhi da ka jingdon u Bah Mayrald Born Syiem, MLA ka Nongpoh, u Bah Balajied Ranee, MDC ka Nongpoh, u Bah C. Syrti, Superintendent ka Ri Bhoi lem bad kiwei de ki riew rangbah jong katei ka thain.
Tang ha ka sngi kaba la pynbna ba ka ktem pulit na Meghalaya kan sa don shirta ha katei ka thain, ki la don haduh 1 pyrton ki pulit ki la leit sha katei ka jaka bad ki ban sa peit sa khmieh ia ka shongsuk shongshngain ki paidbah jong katei ka thain khappud.
Haba kren ha katei ka sngi, u Bah Mayral Born Syiem, u la pynpaw ka jingsngewkmen bad ai ka jingiaroh iaka tnad pulit hapoh ka jingialam u SP, kiba la shimkhia ban phah pulit ha kum kane ka por ba bun ki paidbah ki pynkhein ia ki kyndon, da kaba rung tuh bad khaii tuh iaki mar bad ka jylla Assam kaba long ka jingma kaba khraw halor ka jingsaphriang u khniang jingpang corona virus bad ruh ban iada na ki kam sniew ha katei ka thain.
Nalor u MLA bad MDC ka Nongpoh, hynrei wat ki nongialam Raid, ki nongialam shnong lem bad kiwei, ki la pynpaw lem ia ka jingsngewkmen, hadien ba la urlong katei ka ktem Pulit ha katei ka thain, namar lyngba katei ka ktem pulit kan sa long ka jingmyntoi kaba khraw ia ki paidbah ha katei ka thain bad kaba la pynsuk ia ki, namar kim donkam shuh ban leit ujor sha Byrnihat ne sha Nongpoh haba don kino kino ki kam runar.