Shillong, 13 ’lyngkot:
Ka jingialang bah ka Khasi Students Union (KSU) hynne ka sngi ka la rai ban iai pyrshah beit ia ka jingthmu ban wanrah lynti rel bad tih uranium ha kane ka jylla da kano kano ka lad.
Ka jingialang ka la pdiang ia ka jingkular ka sorkar ban pyntreikam shwa 22 tylli ki jaka rung bad jaka mih ha ka bynta ba nyngkong ban pyndep mynta u snem. Ki jaka rung bad jaka mih ki don 41 tylli ha baroh kawei ka jylla.
Katkum ka jingiathuh u President ka KSU u Bah Daniel Khyriem, ki don 18 tylli ki jaka ban shna ia ki kum ka jaka rung bad jaka mih ha Khasi Hills bad 23 tylli ha Garo Hills. Na kine, 5 tylli ha Khasi Hills bad 18 tylli ha Garo Hills yn pyndep mynta u snem.
Kine ki jaka rung bad jaka mih ki dei ki mat kiba ki 13 tylli ki sengbhalang ka jylla ki la iamynjur lang ban pyntreikam ka sorkar jylla ban tehlakam ia ka jingwan rung ki briew nabar sha kane ka jylla.
U Bah Khyriem u la ong ba ka KSU kumba la ju pyrshah naduh mynshwa, kan iai bteng ban pyrshah ia ka jingthmu ban wanrah ia ka lynti rel bad ia ka jingtih uranium ha kane ka jylla.
“Ha u 2012, u Myntri Rangbah u Dr Mukul Sangma u la ong ba ka sorkar kan nym wanrah lynti rel haduh ban pyntreikam shwa ia ki lad ban tehlakam ia ka jingwanrung ki mynder. Ngi bat beit ia kane ka jingkular jong u Myntri Rangbah”, la ong u Bah Khyriem haba kren mynta ka sngi hadien ba la wai ka jingialang jong ka KSU ha Khasi National Dorbar Hall, Mawkhar.
Halor ka surok na Nongstoin sha Wahkaji, kaba la dep kular ka KHADC ban pynbha hynrei kaba la iatyngkhuh bad ka PWD ka sorkar jylla, u Bah Khyriem u la ong ba ki sengbhalang ki la dep iakynduh ia u CEM bad ia u myntri ka tnad PWD ban pynsted ia kane ka kam. “Ka la dei sa ka jingiapynbeit jongki (Sorkar bad KHADC) ba ki dei ban pynbha noh ia kane ka surok na ka bynta ka jingmyntoi ki paidbah”, u la ong.
Hynrei halor ka jingkylli ba ka KHADC ka la rai ban pyndonkam noh ia ka pisa kaba la mang T. 20 klur namar bym ailad ka sorkar jylla ban shna ia kane ka surok, u Bah Khyriem u la ong, “Lada u CEM u la weng noh ia kane ka rai ban pynbha ia kane ka surok, kumba la iarai bad ki sengbhalang, u la leh bakla namar ba u khlem pyntip ia ki sengbhalang”.
U la ong ba ka KSU ka sngew ba ka KHADC ka dei ban shna beit ia kane ka surok kumba la dep rai bad ki sengbhalang kham mynshwa.
Halor ka kam iakajia pud bad ka Assam, ka KSU ka la kyntu ia ka sorkar ba kan pynsted noh ia kane ka kam khnang ban pynlait ia ki paidbah khamtam ia kito kiba im ha khappud na ka jingsuhsat.
“Ngi pdiang ia ka polisi iashim bad ia ai tangba ka sorkar ka dei shim ia ka jingsngew jong ki briew ba sah ha khappud, namar ba ngim lah ban shu hukum khlem ka mon jong ki paidbah”, la ong u President ka KSU.
U la ong ba ka sorkar jylla ka dei ban pynthikna shwa mynta ban ia ka jingiada ia ki briew ba sah ha khappud namar ba bunsien ki briew na Assam ki leit ban pyndik ia ki briew ba sah ha khappud. U la ong ba ka Meghalaya kam dei ban shu ap shi ap ban jubab ka Assam katba ki paidbah ka jylla pat kiba sah ha khappud, ki nang iakynduh ia ki jingeh.
Halor ka jingshah thombor ki kynthei kaba la jia ha kine ki sngi khamtam ka jingdonkti ki heh sorkar, ka KSU ka la pynrem jur ia kane bad ka la dawa ba ka ain kum ka POCSO kaba la pynngat ia u MLA ka Mawhati u Bah Julius K Dorphang kan leh da kaba tyngeh.
“Ngi pynrem jur ia ka jingjia pyrshah ia ki khynnah, kynthei khamtam da ka jingdonkti jong ki briew kiba long ki nongmihkhmat paidbah”, la ong u President ka KSU.
Phi don ban ong eiei?