Ka KSU, kam salia ia ka jing byrngem ka United Bangal Liberation Army ne BJYM: Lambokstar

Shillong: U President ka Khasi Students’ Union (KSU), Samla Lambokstarwell Marngar, u la ong ba kum ka seng hi kam don kano kano ka jingkheiñ snep khyndiat ruh ia ka jingbyrngem ka seng kieng atiar kaba la tip kyrteng kum kata ka United Bangal Liberation Army ne ka jingujor ejahar jong u Amitesh Chakraborty, President ka Bharatiya Janata Yuva Morcha (BJYM) Cachar District.

Haba iakren bad ki lad pathai khubor u bah Lambokstarwell u la ong “Nga iohi ha ki lad pathai khubor bad don ba phah WhatsApp ba don ba ujor ejahar na Cachar ia nga, da uta u nongkitkam ka BJP Youth Wing.

“Kine ki jingujor ne jingai mukotduma hi ngim sngewphylla bad ngim khein kongsan hi ruh bad ngim don jingkhien snep khyndiat ruh bad ki mat ujor da ki spah tylli namar kaba ngi kham long sngewkhia ka long halor ki mat ia kren bad ka iap ka im na ka bynta ka Ri bad Jaidbynriew”, u la ong.

U la ong ba kam shym la don kano kano ka huri hura ne jingïakynad ha ka Jylla la katto katne bnai mynta bad ka jingjia Ichamati ka mih biang namar ki don ki briew kiba kam ialade kum ki Bengali ki kwah ban ialam bakla da kane ka mat iakren.

U la ong ruh “Kine ki briew ki kwah ban rah ka jingia umsnam bad na ka liang jong ngi, ngi pdiang ia kata. Ka jingjia ha Ichamati ha ka 28 tarik, Rymphang, 2020 ka long hadien ba ngi pynlong jingialang pyrshah ia ka CAA,Ngim don jingthmu ban pyni bor ha katei ka jaka hynrei ynda wai ka jingialang bad ynda la ia pra, ka sa wan ka jingthombor na ka liang jong ki bad dei ma ki ba sdang.”

U la ong ruh ba mynta pat ki kwah jingsngew synei bad kynnoh ba ki shah ñion bein bad kynnoh ba dei ka Jaitbynriew jong ngi ba ka sdang,ka jingpynkhihwin jong ki mynta ka kynti ka long tang ban ioh ia ka jingsngew synei na la ki parajait lajong hadien kane ka jingjia.

Halor ka shithi byrngem na katei ka seng, u ne u nongialam u la ong, “Ngam tip nga ruh ia kata ka shithi kaba wan poi sha ophis ka seng. Ki don ki dkhot kiba la phone bad iathuh ba ka poi kane ka shithi bad nga la phah plied ioh dei ka shithi donkam kyrkieh bad haba la pule lap ba ka dei kata ka shithi na kita ki seng kieng atiar jong ki Bengali”.

U la ong ba um tip la ka dei kaba shisha ne kaba shu long lamler. “Ka dei kaba la saindur mynno bad seng mynno ruh ngam tip. Hynrei nga shu ai kyrwoh tang kane ba ngim sngewpher ia kata. Ym dei tang ma ki ban kieng atiar, namar ngi ruh ngi nang lada ki kwah ban ia pyni bor ha kano kano ka jaka”.

U la buh ruh ia ka jingkylli hato lada ki briew ki wan ban byrngem ia ka Ri bad Jaidbynriew hato yn shu sngap? “Kane ka Jaidbynriew jong ngi kam dei kaba khawpud ne shah jem na shiliang ka Pyrthei na kiwei ki Jylla ki byrngem. Te wan ngin ia tyngkhuh kam dei ka kam beaiñ ban hap iarah lada u briew u wanrah ka wait ne ki tiar ban thombor ia ka Jaidbynriew ngi ruh ngin hap ïada ialade bad kane kam dei kam beaiñ kata”.