Ka KSU ka dei ban sangeh shwa ia ki kam runar, sa iakren, ong u Dr Mukul

Shillong 14 Jylliew:
Ka sorkar ka la pyneh triang ba kan nym khot iakren ia ka KSU lymda ka sangeh shwa ia ki kam runar ban thang iing, thang kali ha kaba iadei bad ka jingpyrshah ia ka jingshna ia ka lynti rel.
Haba kren sha ki nongthoh khubor mynta ka sngi hadien ba la wai ka jingialang ka State Security Commission mynta ka sngi, u Myntri Rangbah u Dr Mukul Sangma u la ong ba um khmih lynti ba kat ka seng KSU kan leh ia ki kam kum ka kynhun ki runar ban pynjulor ia ki mar ki mata. “Ngim khmih lynti ba ka KSU kan leh kum ka kynhun ki runar”, la ong u Dr Mukul.
U la ong ba lada ki kwah ban iakren, ki dei ban sangeh shwa shi syndon ia ki kam runar namar ba ka sorkar kam kwah ban iakren bad kiba leh ia ki kam beain.
“Ngin don ka jingiakren haba donkam, hynrei kaba kongsan ka long ba dei ban sangeh ka jingpynjulor ban leh ia ki kam runar, kam dei ka kam ki riew shai”, u la ong.
U la ong biang, “lada mano mano ba bteng ban leh ia ki kam runar, kumno ngin iakren. Ki dei ban sangeh ban ia ki kam runar na ka bynta ka jingbha jingbit ka jylla baroh”,.
U Myntri Rangbah u la ong ba ha kaba iadei bad ka jingsangeh ka jingshna ia ka lynti rel, un sa bishar bniah ia kane lashai ka sngi kumno ban leh ia kaba donkam.
U la ong ba ka sorkar kan iakren bad ki briew kiba pyni ia ka jinglong jai jai na ka bynta ka jingbha jong u paidbah ka jylla ryngkat ka jingsngew kitkhlieh. Ki nongialam ki dei ban shim ia ka jingkitkhlieh na ka bynta ka jingbha ka jylla bad ki paidbah ym ban thaw da ki kam jingkulmar.