Ka KSP kadei ban tip shwa ïa ka riti bat khyndew ka jylla Meghalaya: Dhar

U Symbud Myntri Rangbah ba khmih ïa ka Tnad Urban Affairs Bah Sniawbhalang Dhar ula ther tyngeh ïa ka seng Hindu-Kutumba Surakshya Parishad (KSP) halor ka jingdawa ban plie ïa ka krem Mawjymbuiñ khlem da tip ïa ka riti bat khyndew hapoh ka Jylla.
Haba ïakren bad ki nongthoh khubor, u Bah Sniawbhalang Dhar ula ong kane ka seng ki Hindu kam lah ban shu buh por ïa ka sorkar jylla.
“Ki dei kiei” ula buh jingkylli.
“Ki (KSP) dei ban tip shuwa ïa ka riti bat khyndew ha ka Jylla. Ki jaka hangne ki dei ki jaka shimet. Ka krem Mawjymbuiñ ruh ka dei ka nongkynti shimet bad kaei kaba ki rai ki trai jaka, ka shong ha ki,” ong u Bah Sniawbhalang.
Ka Kutumba Surakshya Parishad (KSP) ka la aipor 10 sngi ïa ka Sorkar Meghalaya ban plie noh ïa ka krem Mawjymbuiñ ban ïoh lehniam ki paid Hindu. Kane ka kynhun ka la byrngem ban pakhang ïa ki surok ba kongsan ban wan sha Meghalaya kynthup ïa ka Jorabat bad Paikan lada ka jingdawa jong ki kam longkam hashuwa ka Khristmas.