Ka Krem Mawjymbuin, ka hok nongkynti, ka Seng Khasi Mawsynram

Shillong, 19 Jylliew:
Ka krem Mawjym buin, ka la dei mynta ka hok nongkynti jong ka Seng Khasi Hima Maw synram, namar ba ia katei ka jaka, la dep rejister, ha ka sorkar Jylla, ong U Bah Tyllilang Myrthong, President jong katei ka Seng, ha ka jingiakren bad U Rupang.
U bah Myrthong, u iathuh ba ka Seng, ka la shimti ia ka jingkitkhlieh ban peit ban sumar ia katei ka krem, hadien ba ki dkhar, ki la byrngem, ban leit ujor sha Kashari, na ka daw, ba ki ju pynwit eh ki Sengbhalang, ha ki jinglehniam jongki, ba ki ju pynlong man la u snem.
La iathuh da U bah Myrthong, ba ha ka jingshisha, ia katei ka jaka, la ai jingmynjur ban pynlong ia ka jinglehniam, da u Syiem barim jong ka Hima Mawsynram, U Bah Glorence Malngiang, ha kaba ka Shnong Maw synram ruh, ka mynjur lem ia katei ka jingai jingbit jong U Syiem ka Hima. “Nangne sha khmat, lada ki mut ban lehniam, ki hap ban pan jingbit na ka Seng Khasi Hima Mawsynram” ong U Bah Myrthong, ha kaba ula iathuh ruh, ba ki la dep ban rejister ia katei ka seng, ha ka 14tarik Jymmang 2015.
Ha kajuh ka por, u iathuh ruh, ba ia ka krem Mawjymbuin, yn ithuh noh nangne shakhmat, kum ka jaka sahnam bad katei ka dei, hadien ka jingbthah jong ka sorkar India, lyngba ka ophis jong u myntri rangbahduh, kaba ula phah sha ka sorkar Jylla, ha ka 13tarik Jylliew 2016. Kham mynshwa ka tnat kam poh iing ruh, ka la bthah ia ka sorkar Jylla, lyngba U Chief Secretery, ba ki dei ban ithuh noh ia ka Krem Mawjymbuin, kum ka jaka sahnam, hynrei ka sorkar Jylla, kam shym la leh eiei satia, ong shuh U bah Myrthong.